Rusiye ve Türkiye prezidentleri Vladimir Putin ve Recep Tayyip Erdoğan telefonda laf etip, Ukraina meselesini de muzakere etecekler, dep bildirdi Rusiye Tış işler naziri Sergey Lavrov.
Bu aqta o, Federatsiya Şurasında çıqışta bulunıp ayttı.
«Liderlerimizniñ telefon subeti planlaştırıla, bu meseleler (Ukraina – muar.) de muzakere etilecek, dep tüşünem», – dep bildire Lavrovnıñ aytqanlarını «İnterfaks» agentligi.
Lavrov, bu künleri Erdoğan, Ankara Moskva ve Kyiv arasında aracı olmağa azır olğanını bildirdi, dep hatırlattı. Rusiye Tış işler naziri Türkiyeniñ Qırımnen bağlı belli fikri bar ve Moskvanı Minsk añlaşmalarına riayet etmesine çağıra, dep qayd etti.
Putin ve Erdoğan ne vaqıt laf etecekler, Lavrov aytmadı.
Afta başında berilgen malümatqa köre, Türkiye prezidenti Recep Tayyip Erdoğan jurnalistlerge Ankara Rusiye ve Ukraina munasebetlerinde kerginlikni eksiltüvde issesini qoşmağa azır.
«Ukrainadaki vaziyetnen bağlı fikrimiz er keske belli. Türkiye qırımtatarlarnıñ vaziyetini qayd etip, barışıq temin etilmesini istey. Biz bu meseleni bizge dost olğan Rusiyenen çoq laf ettik. Alâqalar devam ete. Region cenk meydanına çevirilmez ve barışıq tiklenir, dep ümüt etemiz. Ankara esnaslarnıñ müsbet inkişafına qoltuta. Türkiye işbirligine azır. Bu meseleni taraflarnen muzakere etmege azır», – dep ayttı Erdoğan Ukraina sıñırına çekilgen Rusiye askerleri ve vaziyetniñ kerginleşmesi aqqında malümat sebebinden.
Bu yıl mayıs ayında Sergey Lavrov Rusiye ve Türkiyeniñ Qırım meselesinde fikirleri farqlı, dep qayd etti. O, Ankaranı «Ukrainanıñ yarımada teşebbüslerine rağbetlendirgeninde» qabaatlap, bunı «Rusiye topraq bütünligine qast etüvnen» qıyasladı.
Kreml, 2014 senesi Rusiye tarafından işğal etilgen Qırımnıñ topraq mensüpligi meselesi muzakerelerge qapalı, dep çoq aytqan edi. 2014 senesi AB ve ABD Qırım işğali sebebinden Rusiyege qarşı sanktsiyalar kirsetti.
