Rusiye prezidenti Vladimir Putin ve Türkiye prezidenti Recep Tayyip Erdoğan yanvarniñ 8-nde İstanbulda «Türk aqımı» gaz borusınıñ açılış merasiminde iştirak etti, dep haber ete Azatlıq Radiosı. Bunıñ ögüne olar «birge bir» formatında eki taraflı muzakereler keçirdi.
Açılışta Sırbistan prezidenti Aleksandr Vuçiç ve Bulğaristan baş naziri Boyko Borisov da iştirak ettiler. Erdoğan, gaz borusınıñ açılışı ögünde yapqan çıqışında İran ve ABD arasındaki zıddiyet mevzusını köterdi. Onıñ aytqanına köre, eki memleket arasında kerginlik «istenilmegen noqtağa» keldi.
Daa evel Kreml matbuat hızmetiniñ bildirgenine köre, Putin, Suriye ve Libiyadaki vaziyetni, em de eki memleket arasında iqtisadiy munasebetlerniñ inkişafını muzakere etmege niyetlene. Erdoğannıñ qayd etkenine köre, o, körüşüvde İdlibteki vaziyet ve Rusiye-Türkiyeniñ Suriye añlaşmalarınıñ yerine ketirilmesini laf etmege azırlana. Türkiye prezidentiniñ matbuat hızmeti bildirgenine köre, eki memleketniñ liderleri general Kasem Suleymaniniñ öldürilüvinden soñ ABD ve İran arasındaki zıddiyetni muzakere etecekler.
«Türk aqımı» gaz borusı Rusiyeniñ Krasnodar ülkesinden Türkiyeniñ Avropa qısmına Qara deñiz tübünden qoyuldı. Uzunlığı tahminen 930 kilometr oldı, umumiy küçü ise yıldan 31,5 milliard kubmetr gaz. Gaz borusınıñ birinci qısmı Türkiyege gaz bere, ekincisi – Cenübiy ve Cenübiy-Şarqiy Avropa memleketlerine. Rusiye, 2019 senesi noyabrniñ ortasında «Türk aqımınıñ» qurucılığı yekünlengenini bildirdi. Bu sene yanvarniñ 5-nde Moskva, gaz Yunanistanğa ve Şimaliy Makedoniyağa berilip başladı, dep bildirdi.
2019 senesi oktâbr ayında Türkiye ve Rusiye prezidentleri Recep Tayyip Erdoğan ve Vladimir Putin Soçide körüşip, Türkiye ve Rusiye Fırat özeninden şarq tarafındaki Suriye-Türkiye sıñırını beraber kontrol etmege añlaştılar. Türkiye ordusı, Ankaranıñ oktâbrniñ başında Suriye şimalinde başlatqan tedbirler neticesinde olarnıñ kontroli altında qalğan sıñırnıñ 30 kilometrlik alanını devriye kezecek. 30 kilometrlik alannıñ qalğan qısımlarına Rusiye arbiy politsiyası kirsetilecek. Kürdler çekilgen soñ sıñırda Rusiye-Türkiye patrulligi başlaycaq. Sıñırğa Suriye prezidenti Başar Asadnıñ kontrolindeki Suriye sıñırcıları qaytacaq.
