İstanbulda yanvarniñ 8-nde Rusiye prezidenti Vladimir Putin ve Türkiye prezidenti Recep Tayyip Erdoğan «birge bir» formatında matbuatsız eki taraflı muzakereler keçirmekte. Körüşüvden soñ olar «Türk aqımı» gaz borusınıñ açılışında iştirak etecekler, dep bildire Azatlıq Radiosı.
Kreml matbuat hızmetiniñ malümatına köre, Putin, Suriye ve Libiyadaki vaziyetni, em de eki memleket arasında iqtisadiy munasebetlerniñ inkişafını muzakere etmege niyetlene. Erdoğannıñ qayd etkenine köre, o, körüşüvde İdlibteki vaziyet ve Rusiye-Türkiyeniñ Suriye añlaşmalarınıñ yerine ketirilmesini laf etmege azırlana. Türkiye prezidentiniñ matbuat hızmeti bildirgenine köre, eki memleketniñ liderleri general Kasem Suleymaniniñ öldürilüvinden soñ ABD ve İran arasındaki zıddiyetni muzakere etecekler.
Yanvarniñ 8-nde saba Ukraina Tış işler naziri Vadım Prıstaykonıñ Türkiye zenaatdaşı Mevlüt Çavuşoğlunıñ malümatına esaslanıp bildirgenine köre, Türkiye, Putinniñ İstanbul ziyareti vaqtında Qırımnı işğalden qurtaruv meselesini kötermege planlaştıra.
«Türk aqımı» gaz borusı Rusiyeniñ Krasnodar ülkesinden Türkiyeniñ Avropa qısmına Qara deñiz tübünden qoyuldı. Uzunlığı tahminen 930 kilometr oldı, umumiy küçü ise yıldan 31,5 milliard kübmetr gaz. Gaz borusınıñ birinci qısmı Türkiyege gaz bere, ekincisi – Cenübiy ve Cenübiy-Şarqiy Avropa memleketlerine. Rusiye, 2019 senesi noyabrniñ ortasında «Türk aqımınıñ» qurucılığı yekünlengenini bildirdi. Bu sene yanvarniñ 5-nde Moskva, gaz Yunanistanğa ve Şimaliy Makedoniyağa berilip başladı, dep bildirdi.
