Rusiye prezidenti Vladimir Putin ve Türkiye prezidenti Recep Tayyip Erdoğan cuma künü telefonda laf etip, İdlib vaziyetini muzakere ettiler. Bu aqta Rusiye Tış işler naziri Sergey Lavrov matbuat konferentsiyasında ayttı.
«Bugün Türkiye Cumhuriyeti yolbaşçısınıñ ricasınen prezidentler telefonda laf etti. Subet tafsilâtlı oldı, o, kerginlikni toqtatuv alanı boyunca añlaşmalarnı yerine ketirmek içün yapılacaq areketlerge bağışlandı», – dep bildire Rusiye müessisesi yolbaşçısınıñ aytqanlarını TASS haber agentligi.
Lavrovnıñ bildirgenine köre, eki memleketniñ prezidentleri İdlib vaziyetinen bağlı alâqalarnı çeşit seviyelerde baqtılar.
Türkiye tarafı prezidentlerniñ subeti aqqında şimdilik haber etmedi.
Daa evel haber etilgenine köre, NATOnıñ 29 aza memleketiniñ elçileri kirgen Şimaliy atlantik şura Suriyedeki vaziyetten sebep toplaşacaq.
Fevralniñ 27-nde Suriye prezidenti Başar Asad quvetleriniñ memleketniñ şimal-ğarbinde yapqan ücümi neticesinde eñ az 33 türk askeri elâk oldı, 36-sı yaralandı.
Rusiye prezidenti Vladimir Putin ve Türkiye prezidenti Recep Tayyip Erdoğan cuma künü telefonda laf etip, İdlib vaziyetini muzakere ettiler.
Soñki aftaları Suriye prezidenti Başar Asadnıñ ordusı Rusiyeden destek alıp, memlekette kontrol etmegen soñki isyancı anklavını yoq etmek içün ücüm etti. Böyle etip İdlib vilâyetiniñ cenübinde ve qomşu Aleppo vilâyetinde topraqlarnı zapt etti.
Türkiye, muhalifetke yardım etmek içün Asadnıñ ücümine cevap olaraq İdlibte askerleriniñ sayısını arttırdı. Türkiye ordusınıñ yardımınen silâlı muhalifetniñ ğalebeleri aqqında haber etile. Berilgen malümatqa köre, olar İdlib vilâyetindeki Sarakib şeerini kontrol altında aldı ve Aleppodan Dimaşqqa yolnı qapattı.
Asad ordusınıñ ücümi büyük qaçaq dalğasına yol açtı: BM malümatına köre, dekabrniñ soñundan başlap yarısından çoq bala olğan tahminen 900 biñ kişi evlerini ya da muvaqqat sığınaqlarnı terk etmege mecbur olıp, suvuq qışta evsiz qaldı.
