Rusiye ve Türkiye prezidentleri Vladimir Putin ve Recep Tayyip Erdoğan martnıñ 5-nde ya da 6-nda Moskvada körüşe bile, dep bildirdi «TASS» Rusiye haber agentligi Rusiye prezidentiniñ matbuat kâtibi Dmitriy Peskovnıñ beyanatına esaslanıp.
«Al-azırda Rusiye prezidenti ve Türkiye prezidentiniñ martnıñ 5-nde ya da 6-nda olacaq körüşüvi baqıla», – dep bildirdi o.
Türkiye tarafı prezidentlerniñ körüşüvi aqqında şimdilik haber etmedi.
Fevralniñ 27-nde Suriye prezidenti Başar Asad quvetleriniñ memleketniñ şimal-ğarbinde yapqan ücümi neticesinde eñ az 33 türk askeri elâk oldı, 36-sı yaralandı.
Soñki aftaları Suriye prezidenti Başar Asadnıñ ordusı Rusiyeden destek alıp, memlekette kontrol etmegen soñki isyancı anklavını yoq etmek içün ücüm etti. Böyle etip İdlib vilâyetiniñ cenübinde ve qomşu Aleppo vilâyetinde topraqlarnı zapt etti.
Türkiye, muhalifetke yardım etmek içün Asadnıñ ücümine cevap olaraq İdlibte askerleriniñ sayısını arttırdı. Türkiye ordusınıñ yardımınen silâlı muhalifetniñ ğalebeleri aqqında haber etile. Berilgen malümatqa köre, olar İdlib vilâyetindeki Sarakib şeerini kontrol altında aldı ve Aleppodan Dimaşqqa yolnı qapattı.
Asad ordusınıñ ücümi büyük qaçaq dalğasına yol açtı: BM malümatına köre, dekabrniñ soñundan başlap yarısından çoq bala olğan tahminen 900 biñ kişi evlerini ya da muvaqqat sığınaqlarnı terk etmege mecbur olıp, suvuq qışta evsiz qaldı.
