Putin Rusiyeniñ Şimaliy flotunı ziyaret etkende aytqanına köre, bu Ukrayinada «demokratik saylavlar» keçirmek ve barışıq muzakereleriniñ keçirilmesi mümkün olğan «halqnıñ işançını qazanğan ükümetni akimiyetke ketirmek» içün kerek ola bile.
Rusiye prezidentiniñ aytqanına köre, böyle ğaye «BM, ABD, Avropa memleketlerinen» ve Rusiyeniñ «ortaqları ve dostlarınen» ömürge keçirmek mümkün.
Putin Ukrayinanıñ şimdiki reberligini qanunsız saya ve şunıñ içün bir de bir vesiqa imzalamaqtan çekine, dep kene tekrarladı.
«Bu tek variantlardan biri ola. Başqası yoq demeyim», – dep ayttı Rusiye prezidenti.
Rusiye prezidenti Rusiye Ukrayinağa qarşı büyük istilâ «başında aytılğan bütün maqsadlarına eminliknen areket ete», dep ayttı.
«Olarnı yeñermiz dep tüşünmek içün sebeplerimiz bar», – dedi Putin ve aynı beyanatta Rusiye barışıqqa azır, dep bildirdi.
Onıñ aytqanına köre, ABD prezidenti Donald Trump Ukrayinada barışıq olmasını istey.
Putin bir qaç kere Ukrayina prezidenti Volodımır Zelenskıynıñ qanuniy olmağanını aytqan edi. Cumaaqşamı künü çıqış yapıp, tek Zelenskıy degil, Ukrayinadaki diger «vatandaş akimiyetleri» de qanunsız olğanından emin olğanını bildirdi.
Putinniñ soñki beyanatlarına Ukrayina tarafından bir cevap olmadı.
Martnıñ 18-yde aqşam Donald Trump ve Vladimir Putin eki saatqa yaqın telefon subetini keçirdiler. Beyaz Saraynıñ malümatına köre, olar barışıqqa doğru areket «energetika ve infrastruktura ateşkesinden, em de Qara deñizde deñiz barışığı, bütünley ateşkes ve daimiy barışıqnı ömürge keçirmek içün tehnikiy muzakerelerden» başlanacağına razı oldılar.
Aynı vaqıtta, martnıñ 26-nda, Ukrayina prezidentiniñ mesleatçısı Dmıtro Litvin Rusiye martnıñ 18-nden başlap kirsetilgen Ukrayina energetika infrastrukturasına ücümlerniñ toqtatılğanı aqqında yalan malümat tarqatqanını bildirdi. Onıñ aytqanına köre, o vaqıttan berli energetika obyektlerine eñ az sekiz darbe oldı, Ukrayina ava mudafaası ise er kün onlarnen darbe dronını urıp tüşüre. Litvin Kremlniñ beyanatlarını yalan dep adlandırdı ve halqara ortaqlarnı er bir rus sözüni teşkermege çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
