Rusiye Ukrayina boyunca ABD prezidenti Donald Trampnıñ yañı memuriyeti ile dialog qurmağa azır, dep bildirdi yanvarniñ 20-nde Rusiye prezidenti Vladimir Putin Rusiye havfsızlıq şurasınıñ toplaşuvında.
"Bizler Ukrayina zıddiyeti (Rusiyeniñ Ukrayinağa qarşı cenki — QA) sebebinden ABD-niñ yañı memuriyetinen dialog qurmağa azırmız. Eñ esası — bu buhrannıñ esas sebeplerini çezmek, bu aqta defalarca laf ettik. Bu eñ müimi", — dep ayttı Putin.
O şunı da qoştı ki, er angi añlaşma "bölgede yaşağan bütün halqlarnıñ qanuniy menfaatlarına riayet etüv esasında sağlam barışıqnı temin etmek kerek".
Putin, Donald Trampnı ABD prezidenti vazifesine kirgeninen tebriklep, Rusiye ABD ile "iç biri-birine ürmet esasında" dialog qurmağa ümüt etkenini bildirdi.
"Ümüt etemiz ki, dialogımız musaviylik ve qarşılıqlı sayğı esasında qurulacaq ve memleketlerimizniñ (Rusiye ve ABD — QA) global kün tertibindeki bir sıra meselelerni, şu cümleden strategik stabillik ve telükesizlik meselelerini çezüvde oynaycaq müim rolüni köz ögüne alacaq", — dep ayttı Putin.
Bundan evel CNN telekanalı menbalarğa atıf etip, Tramp yardımcılarına Rusiye lideri Vladimir Putin ile telefon subetini teşkil etmekni emir etkenini bildirdi. Olarnıñ aytqanına köre, ABD-niñ yañı saylanğan prezidenti inauguratsiyadan soñ birinci künleri Rusiye prezidentinen körüşip, şahsiy körüşüv aqqında laf etmek istey. Qayd etilgenine köre, Trampnıñ Rusiyeniñ Ukrayinağa qarşı cenkini çezmek içün tezden çalışmağa ümüt eteler.
Trampnıñ kelecekteki milliy havfsızlıq mesleatçısı Mayk Uolttsnıñ aytqanına köre, onıñ Putin ile muzakeresi yaqın künlerde ya da aftalarda olacaqtır.
Donald Tramp saylav kampaniyası vaqtında Rusiye Federatsiyasınıñ Ukrayinadaki cenkini 24 saat içinde toqtatıp olur, dep aytqan edi. Yanvarniñ 7-nde matbuat konferentsiyasında o, cenk areketlerini altı ay içinde bitirmege ümüt etkenini ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
