Vladimir Putin, Rusiye ordusınıñ komandanlığınıñ yedekte olğan askerlerni ve askerlikke celp etilgenlerni, Rusiye prezidenti degeni kibi, Ukraina topraqlarında "mahsus arbiy operatsiyanıñ" keçirilmesinde qullanmamağa söz berdi
Putin, martnıñ 8-nde qadınlarnı bayram ile hayırlap, onıñ fikrince "şimdi uruşlarda Rusiyeni imaye etken" askerlerniñ analarına, apaylarına, tatalarına, kelinlerine ve dostlarına muracaat etti. Putin "qoyulğan vazifelerni tek ihtisasiy arbiyler eda etkenini" qayd etti ve olarnıñ "Rusiye halqı içün telükesizlikni ve sulhnı kerek şekildi temin eteceklerine" emin olğanını bildirdi.
Aynı zamanda, soñ künler bir sıra arbiy eksepert, Rusiye ordusınıqoşma seferberlik olmadan Ukrainada ögüne qoyulğan vazifelerine nail ola bilemecegi aqqında fikir bildirdiler.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
