Kreml yolbaşçısı Vladimir Putin, ABD saylanğan prezidenti Donald Trampnıñ taqımı 2024 senesi noyabrniñ başında baqqan Ukrayinağa qarşı cenkni toqtatmaq teklifini red etti, dep yazalar ABD cenkni ögrenüv institutınıñ (ISW) ekspertleri.
Olar hatırlatalar ki, bu teklif Ukrayinağa NATO azası olmaqnı eñ az 10 yılğa qaldırmaqnı közde tuta edi.
Dekabrniñ 26-nda Putin, Ukrayinanıñ NATO-ğa "bugün, yarın ya da 10 yıl soñra" qoşulması müim degil, dep bildirdi.
"Putinniñ dekabrniñ 26-sından beyanatı, 2021 senesiniñ soñunda ve 2022 senesiniñ başında öz talapları boyunca uzlaşuvlarnı baqmaqtan vazgeçkenini tekrarlap, yapqan tefsirleriniñ bir qısmıdır. Bu talaplar arasında Ukrayinanı, NATO-ğa iç bir vaqıt qoşulmağan, daima bitaraf devlet olmağa mecbur etmek, ukrayin ordusınıñ sayısına sıñırlavlar qoymaq ve ukrayin ükümetini yoq etmek", — dep qayd ete ISW analitikleri.
Rusiye prezidenti Vladimir Putin er angi barışıq muzakereleri içün esas olaraq "İstanbul añlaşmaları" metnini adlandıra, Rusiye tarafı, 2022 senesi mart ayında Moskvanıñ tam mıqyaslı istilâsınıñ ilk aftalarında Ukrayina ve RF vekilleriniñ muzakereleriniñ neticesi olğanını iddia ete.
Azatlıq Radiosı bu añlaşmanıñ leyhasını aldı. "Ukrayinada vaziyetni al etüv ve Ukrayinanıñ tarafsızlığı aqqında añlaşma" adlı leyha 2022 senesi martnıñ 7-ne ait.
Rusiye ordusı Ukrayina ile sıñırnıñ aman-aman bütün qısımlarına ücüm etken soñ, Rusiye Federatsiyası, bir taraflı şartları Kıyivniñ teslim olmasını közde tutqan añlaşmanı teklif etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
