Rusiye prezidenti Vladimir Putin «Yigirmi gruppası» (G-20) sammitinde ABD prezidenti Donald Trump ile körüşkende Rusiyeniñ Qırım yalısı yanında tutqan Ukraina gemileri ve deñizcileri meselesi köterildi, faqat bu mesele daa al etilmedi, dep bildirdi.
«Bu mesele köterildi. Üyle yemeginde ve körüşüvimiz vaqtında endi hatırlamayım, amma, nasıl olsa da, ABD prezidenti bu mevzunı subetimizniñ eñ müim meseleleri sırasına kirsetti», – dep bildirdi jurnalistlerge Putin G-20 sammiti neticesinde, dep haber ete TASS.
Putinniñ qayd etkenine köre, bu mesele boyunca «qarar daa yoq, mahkeme tahqiqatı devam ete, neticelerini beklemek kerek, soñra ise qarar alınacaq».
«Amma eñ esası bunıñ saylavaldı kampaniyası (Ukrainada – QA) çerçivesinde olmaması, bu esnaslar Ukrainanıñ iç siyasiy kün tertibinen bağlı olmamalı», – dep bildirdi Rusiye prezidenti.
Donald Trump Vladimir Putin yolbaşçılığında Rusiye eyyeti ile sammit ögüne jurnalistniñ Rusiye FSBsi tarafından Ukraina gemileri ve deñizcileriniñ zapt etilüvi eki memleket arasında munasebetlerde problem olıp qalamı sualine qısqadan «bunı muzakere etmegenlerini» ayttı.
New York Times neşiri Trump ve Putinniñ bir buçuq saatlıq subeti neticesinde Beyaz saray prezidentler İran, Suriye, Venesuela ve Ukraina vaziyetlerini muzakere etkenleri aqqında bildirgenine diqqat celp etti. Faqat haberde ABD ve Rusiye liderleri Rusiye FSBsi tarafından zapt etilgen ukrainalı deñizciler, MH-17 felâketiniñ tahqiqatı aqqında laf ettilermi-yoqmı aytılmay.
Rusiye devlet kütleviy haber vastaları Trump Putinni «yahşı bir oğlan» dep adlandırıp, ABD ve Rusiye arasında ticariy muzakereler başlağanını bildirdi. Rusiye prezidentiniñ matbuat kâtibi Dmitriy Peskovnıñ aytqanına köre, liderler yaqın vaqıtta Rusiye ve ABD maliye nazirleri körüşecek, dep añlaştı. İşbu körüşüvde taraflar Moskva ve Washington arasındaki ticariy-iqtisadiy işbirliginiñ faalleştirilüvine neler keder etkenini belgileycek.
Keçken seneniñ soñunda Trump Buenos Airesta «Büyük yigirmi» sammitinde Putin ile keçirecek olğan körüşüvni lâğu etken soñ bu körüşüv ilk oldı. O vaqıt körüşüv işğal etilgen Qırım yalısında Rusiye sıñırcıları tarafından 24 ukrainalı deñizciniñ zapt etilüvi olğan edi. Bu müddet içinde prezidentler tek bir kere mayıs ayında telefonda laf etken ediler.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
