ABDniñ yañı saylanğan prezidenti Donald Trump Rusiye zenaatdaşı Vladimir Putinnen körüşmege planlaştıra.
«Bulunğan bu müthiş cenklerimizni kördim. Yapmağa ve tez yapmağa istegen işlerimden biri, prezident Putin mennen tezce körüşmege istegenini bildirdi. Şunıñ içün beklemek kerekmiz, amma bu cenkni bitirmelimiz», – dedi Trump Feniksteki çıqış vaqtında.
Onıñ qayd etkenine köre, «şimdi devam etken cenk deşetli bir şey». Aynı vaqıtta, Trumpnıñ aytqanına köre, o, prezident olsa edi, böyle bir şey olmaz edi.
«Millionlarnen asker elâk oldı. Millionlarnen. Toplaşamız… Qorqunç raqamlarnı köremiz. Bunı toqtatmaq kerekmiz. Bu ahmaqlıqtır. Men prezident olğan olsam, bu olmaz edi. Bu cenk iç bir vaqıt olmaz edi», – dep qayd etti o.
«Ukrayinadaki cenkni bitirecem. Yaqın Şarqtaki haosnı bitirecem. Üçünci Cian cenkine yol bermem, dep söz berem», – dep qayd etti Trump.
Putin saylanğan ABD prezidenti Donald Trumpnen laf etmedi, amma «buña azır», dep aytqan edi dekabrniñ 19-nda keçirilgen matbuat konferentsiyasında.
ABDniñ yañı saylanğan prezidenti Donald Trumpnıñ Ukrayina mahsus vekili Kit Kellog Ukrayina ve Rusiye barışıq muzakerelerine endi azır olğanından emin olğanını bildirdi.
Rusiyeniñ Tış işler naziri Sergey Lavrov dekabrniñ 6-nda Ukrayinadaki barışıq tek Kyiv NATO azalığından vazgeçse ve Ukrayina öz topraqlarınıñ bir qısmını coysa mümkün olğanını ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
