Rusiye prezidenti Vladimir Putin patlav ve yanğından soñ tamir etilgen Keriç köprüniñ maşina qısmından keçti, dep haber ete Rusiye prezidentiniñ matbuat hızmeti dekabrniñ 5-nde.
Berilen malümatqa köre, Putin «tamir etilgen yol qısmını baqtı». Yanında Rusiye ükümetiniñ reis muavini Marat Husnullin bar edi.
«Tamir işleri aqqında Vladimir Putinge Uprdor «Taman» baş müendisi Nikita Hrapov ve «Nijneangarsktransstroy» baş müdiriniñ muavini Yevgeniy Çibışev tarif ettiler», – dep aytıla haberde.
Bu malümatnı mustaqil menbalarda teşkermek imkânsız ola.
Oktâbrniñ 8-nde saba Qırım köpründe patlav oldı. Rusiye tahqiqatçılarınıñ versiyasına köre, yük maşinası patladı. Neticede eki maşina yolu zarar kördi, patlav sebebinden ya da aynı vaqıtta köpürniñ tren yolundan ketken yük treni yanıp başladı. Başta üç ölü, soñra patlavnıñ dört qurbanı aqqında haber etildi.
Rusiye prezidenti Vladimir Putin bu patlavnı «terakt» dep adlandırdı, onıñ icracıları ve sımarış etkenler Ukrayina mahsus hızmetleri ola. Rusiye Tahqiqat komiteti Rusiye Ceza kodeksiniñ 205-inci maddesine («Terrorizm») istinaden cinaiy dava açtı.
Ukrayına prezidenti Volodımır Zelenskıy Kyiv köpürdeki patlavnı «sımarlamadı», dep bildirdi.
Ukrayına Baş istihbarat idaresiniñ spikeri Andrey Yusov Rusiyeniñ Keriç köpründe patlav tahqiqatını «saçmalıq» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
