Rusiye prezidenti Vladimir Putin, Türkiye prezidenti Recep Tayyip Erdoğannıñ Rusiyeniñ Qırım ilhaqını tanımaması oña «meraqlı degil», dep bildirdi. Bu aqta o, NTV Rusiye telekanalı YouTubeta yayınlağan «Valday» munaqaşa klubınıñ toplaşuvında ayttı.
«Türkiyeniñ Qırımnı Rusiye olaraq tanımamasını aytsaq – ne yapayıq, fikirlerimiz bir degil. Meselâ, Cenübiy Kavkaz vaziyetinen bağlı… (Türkiye prezidenti Erdoğannıñ – QA) Qırımnen bağlı diger ıntıluvlarını aytsaq: bunı bilmeyim. Meraqlı degil, çünki Rusiyeniñ menfaatları yahşı qoruna. Bir saniye şübheñiz olmasın», – dedi Putin.
Hatırlatamız, Türkiye prezidenti Recep Tayyip Erdoğan Ukraina prezidenti Volodımır Zelenskıy ile oktâbrniñ 16-nda keçirgen matbuat konferentsiyasında Ankara Rusiyeniñ Qırım ilhaqını tanımadı ve tanımaycaq ve qırımtatarlarğa qol tutmağa devam etecek, dep bildirdi.
Ukraina ve Türkiye prezidentleriniñ beyanatlarında Ankara Kyiv ile yarımadanı işğalden qurtaruv Qırım platforması çerçivesinde işbirligi yapmağa azır, dep aytıla.
Türkiye prezidentiniñ beyanatını Rusiye kontrolindeki senatorlar ve qırımlı deputatlar tenqit etti.
