Rusiye prezidenti Vladimir Putin yanvarniñ 7-nde Suriyeniñ paytahtı Dimaşqqa keldi. Ziyaret aqqında daa evel haber etilmegen edi.
Rusiye agentliginiñ Putinniñ matbuat kâtibi Dmitriy Peskovnıñ malümatına esaslanıp yazğanlarına köre, Putin ava limanından Suriyedeki Rusiye ordusı gruppirovkasınıñ komandanlıq noqtasına yol aldı. Anda o, Suriye prezidenti Başar Asadnen körüşti, Rusiye onıñ ordusına yardım ete, dep haber ete Azatlıq Radiosı.
Peskovnıñ aytqanına köre, Putin, «Suriye devlet ve topraq bütünligini ğayrıdan tiklev yolunda büyük iş yapıldı», dep qayd etti. Asad Rusiyege köstergen yardımı içün teşekkürler bildirdi.
Putinnen beraber Rusiye mudafaa naziri Sergey Şoygu da ketti.
Putin, İran generalı Kasem Suleymani öldürilgen ABD tedbirlerinden soñ Yaqın Şarqtı vaziyet kerginleşken soñ Suriyege keldi. İran, Rusiye kibi, Başar Asadqa silâlı muhalifet ile küreşte yardım ete. Suriyedeki ABD ittifaqdaşları – Suriye kürdleri, Amerika arbiyleri memleketniñ şarqında «İslâm devleti» terror taqımına qarşı küreşmek maqsadınen yerleştirildi. Putinniñ ziyareti Suleymaniniñ ölüminden evel planlaştırılğan edimi-yoqmı añlaşılmay.
Yanvarniñ 8-nde Rusiye prezidentiniñ Türkiyeni ziyaret etmesi beklenile. Anda o, «Türk aqımı» gaz borusınıñ açılışında iştirak etecek.
- 2012 senesinden berli Suriyede vatandaş cenki kete. Rusiye terrorizm ile küreşecegini bildirip, 2015 senesi sentâbrniñ 30-nda Suriyede arbiy tedbirler başlattı. Asad ordusı memleketniñ büyük qısmını kontrol altına alıp oldı. Aq qorçalayıcılar Suriye ükümet ordusını ve Rusiye arbiylerini sakinlerniñ kütleviy ölümlerinde qabaatladı.
- Putin, keçken sefer, 2017 senesi dekabr ayında, Suriyeni ziyaret etip, memlekette ğalebe qazanıldı ve Rusiye ordusı çıqacaq, dep bildirdi. Faqat memlekette Rusiye arbiy bazaları qala, Rusiye arbiyleri ise cenk tedbirlerinde iştirak ete.
