Rusiye prezidenti Vladimir Putin, Rusiye Federal bergi hızmetiniñ yolbaşçısı Mihail Mişustinni Devlet dumasına baş nazir vazifesine namzet olaraq teklif etti. Bu aqta Kreml matbuat hızmeti bildirdi.
«Prezident Vladimir Putin Mihail Mişustinnen iş körüşüvini keçirip, oña ükümet reisi vazifesini almağa teklif etti. Müsbet cevap alıp, Mişustinniñ namzetini Devlet dumasına baş nazir vazifesine teklif ettim», – dep bildirdi matbuat hızmeti.
Daa evel haber etilgenine köre, Rusiye baş naziri Dmitriy Medvedev ve ükümeti Rusiye prezidenti ilân etken Rusiye anayasasınıñ deñişmeleri aqqında teklifler sebebinden istifağa çıqa.
Mişustin 2010 senesi aprel ayından berli Federal bergi hızmetiniñ yolbaşçısı edi.
Mihail Mişustin 1996 senesi Moskvada dünyağa keldi. 1998 senesi avgustniñ 22-nden başlap Rusiye Devlet bergi hızmetiniñ reber muavini edi. 1999 senesi mart ayından başlap 2004 senesi mart ayına qadar Rusiye bergi ve alım naziriniñ muavini edi.
2004 senesi martnıñ 22-nden başlap 2006 senesi dekabrniñ 18-ne qadar – Federal mülk obyektleri kadastr agentliginiñ reberi (2009 senesi mart ayında lâğu etilgen Rosnedvijimost).
2006 senesi dekabr ayından başlap 2008 senesi fevralniñ 29-na qadar Mihail Mişustin Federal hususiy iqtisadiy alanlarnı idare agentliginiñ reberi (2009 senesi oktâbr ayında lâğu etilgen RosOEZ).
2008-2010 seneleri – UFG Capital Partners şirketiniñ prezidenti ve UFG Asset Management şirketler gruppasınıñ idareci ortağı (aktiv, yatırım biznesiniñ idaresi), vençur vaqfını, mal-mülk ve regiondaki biznes inkişafı vaqfını ve başlatuv leyhalarını idare etti.
