ABD halqara inkişaf agentligi (USAID) Ukrayınağa qızdıruv mevsimine azırlanması içün 55 mln dollar berecek. Böylece Rusiyeniñ daa bir silâsı – suvuqnı – qullanuv planlarını bozacaq. Bu aqta teşkilât yolbaşçısı Samanta Pauer Kyivdeki matbuat konferentsiyasında ayttı.
«Vatandaş ealisine qarşı cenk silâsı olaraq qullanılğan toplardan ğayrı Putin aşnı cenk aleti olaraq qullana, bunı endi yapqan edi. Şimdi ise Putinniñ qışnı cenk vastası olaraq qullanmağa niyetlengenini bilemiz», – dedi Pauer.
USAID Ukrayına infrastrukturasını qızdıruv mevsimine azırlıqnı temin etecek yañı qoltutuv leyhasını başlattı. 55 mln dollar borularnı ve energetik obyektlerni ğayrıdan tiklemek, yaqarlıq almaq içün qullanılacaq. Rusiye ücüminden eñ çoq zarar körgen regionlarğa çoqça diqqat ayırmağa planlaştıralar.
«Bu yardım bu qışta 7 million ukrayınnı sıcaqnen temin etmege imkân berecek, bu pek müim. Daa büyük ihtiyac bar olğanını bilemiz, şunıñ içün diger memleketlernen, diger donorlarnen çalışamız, bu kritik problemağa diqqat etsinler dep», – dep ayta Samanta Pauer.
Oktâbrniñ 6-nda USAID yolbaşçısı Samanta Pauer Kyivni ziyaret etti. O, Ukrayına prezidenti Volodımır Zelenskıynen körüşti.
Onıñ aytqanına köre, körüşüv vaqtında işbirligi programmaları, Ukrayınanı tez ğayrıdan tiklev planınıñ yerine ketirilüvi muzakere etildi. Tünevinki video muracaatında Samanta Pauerge Ukrayınağa qış mevsimine azırlanması içün maddiy yardımda bulunğanları içün teşekkürler bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
