Qırım bu cenkniñ maqsadıdır ve Rusiye akimiyeti onı ğayıp etkende, "Putin ölecek, fizikiy olmasa da, siyasiy manada ölecek". Bu aqta jurnalist ve publitsist Yuriy Lukanov "Qırım platforması" Üçünci parlament sammitiniñ arfesinde matbuat konferentsiyasında bildirdi, dep haber ete Qırım.Aqiqat mühbiri.
Tedbirde Yuriy Lukanov Qırımda söz serbestliginiñ sıñırlanuvı aqqında "Basqı maşnası" kitabını taqdim etti, em de yarımadada Rusiye ordusı tarafından zapt etilgende olıp keçken vaqialar aqqında öz teessuratlarını paylaştı.
Qırımtatar Milliy Meclisiniñ vekili Gayana Yüksel matbuat konferentsiyası devamında işğalden soñ 200-den ziyade jurnalist ve bütün muarririyetler Qırımnı terk etmege mecbur olğanını qayd etti.
"Halqara Qırım platforması"nıñ üçünci parlament sammitiniñ işi oktâbrniñ 24-nde Riqada başlanacaq. Oktâbrniñ 23-nde qırımtatar halqınıñ vekilleri tarafından teşkil etilgen tedbirniñ resmiy olmağan qısmı başlandı. İştirakçiler arasında Qırımtatar Milliy Meclisiniñ reisi Refat Çubarov, deñişim çerçivesinde azat etilgen Meclis reisiniñ muavini Nariman Celâl ve Eskender Bariyev.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
