Link açıqlığı

Rusiye Prezidenti Vladimir Putin Qırım referendumı Rusiye ordusınıñ nişanı altında keçirilgenini tanıdı. Bunı o rusiyeliler ile «canlı bağ»ı devamında bildirdi.

«Bizim vazifemiz qırımlılarnıñ belgilev aqlarını teminlemekten ibaret edi. Şunıñ içün biz vaziyetniñ inkişafı şimdi Ukraina cenübiy-şarqında olğanı kibi - tank, milletçilerniñ arbiy bölükleri ve silâlı insanlarnıñ bulunğanı ile - keçirilmemesi içün areket etmek kerek edik. Şunıñ içün Qırım halq imayesi arqasından, elbette, bizim arbiy hızmetçilerimiz turdı, olar muqaytlıqnen, amma cüratnen areket ete ediler», – dedi o.

Putin emin, referndumnı başqaca keçirmege mümkün degil edi.

O, Qırımda o vaqıt Ukrainanıñ 20 biñ «yüksek seviyede silâlı arbiy hızmetçisiniñ» bulunğanını ve insanlarnı «vatandaşlarğa qarşı silânıñ qullanuv imkâniyetinden» qorçalamaq kerek olğanını aytıp keçe.

Mart ayında Qırımda Rusiyeniñ arbiy ve siyasiy destegi ile Ukraina ve dünyada tanılmağan «Qırımnıñ belgilev referendumı» keçti. Öz başına tayinlengen Qırım akimiyeti bergen malümatına köre, saylavlarda iştirak etkenlerniñ 97% Qrımnıñ Rusiyege qoşuluvı içün rey berdi. Neticede Qırımnıñ qanunsız parlamenti Rusiyege Qırımnı öz terkibine almağa rica etti. Mart 18 künü Kremlde Qırım ve Aqyarnıñ Rusiyege qoşuluvı aqqında añlaşma imzalandı.
XS
SM
MD
LG