Rusiye prezidenti Vladimir Putin Qırım ilhaqınıñ beşinci yılına bağışlanğan tedbirlerde iştirak etecek, dep bildirdi martnıñ 13-nde Rusiye prezidentiniñ matbuat kâtibi Dmitriy Peskov.
Aynı vaqıtta, Kreml yarımadağa baracaqmı-yoqmı daa haber etmedi.
TASS Rusiye haber agentliginiñ malümatına köre, Rusiye prezidentiniñ matbuat kâtibi Dmitriy Peskov prezident Qırımğa baracaqmı sualine tam olaraq cevap bermedi.
«Prezibent böyle qararğa kelse, sizge haber etermiz», – dedi o ve «Putin tedbirlerde kerekli kişi iştirak eteceginden» şübhe olmamalı, dep qoştı.
Bundan evel «Grajdanskiy ştab v podderjku Putina» cemaat areketiniñ keñeş reisi Aleksandr Sinâvskiy bildirdi ki, martnıñ 16-nda Aqmescit-Aqyar avtoyürüşiniñ keçirilmesi ve Aqyardaki Gasforta dağında «Noçnıye volki» motoklubınıñ meydanında «samooborona» vekilleri, qazaq ve «opolçenlerniñ» qarşılanması beklenile.
Bundan ğayrı, Aqmescitte martnıñ 15-nde Qırım işğaliniñ beş yılına bağışlanğan avtoyürüşini Rusiye bayraqlarınen keçirmege planlaştıralar.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
