Kyivniñ öz ittifaqdaşlarından ğarbiy silâlarnen Rusiye Federatsiyasınıñ terenliklerine ücüm etmek içün ruhset almaq ıntıluvlarına Kreml yolbaşçısı Vladimir Putin «özek cevabı» aqqında ilân etti.
Onıñ aytqanına köre, Rusiye er bir özek olmağan devletniñ istilâsını, amma «özek klubından» bir devletniñ iştiraki ya da destegi ile, birleşken ücüm olaraq baqmağa planlaştıra.
«Vesiqanıñ yañılanğan variantında er bir özek olmağan devletniñ Rusiyege qarşı istilâsı, amma özek devletiniñ iştiraki ya da destegi ile olarnıñ Rusiye Federatsiyasına birleşken ücümi olaraq baqılması teklif etile», — dedi o, Rusiyeniñ Havfsızlıq Şurasınıñ özek cenkleşüvleri boyunca daimiy toplaşuvında.
Putin bunı da ayttı: Moskva Rusiye ve Beyazrusiyege qarşı istilâ olğanda, hususan adiy silâ qullanılğanda ve «suverenitetke kritik telüke» yaratılğanda, özek silâsını qullanmaq aqqını saqlay.
Bundan da ğayrı, onıñ aytqanına köre, Moskva aerokosmik ücüm silâlarını kütleviy sürette çıqarmaq aqqında işançlı malümat alğan soñ, özek silâsını qullanmaq imkânını baqıp çıqacaq.
«Rusiyeniñ özek silâsını qullanuvğa keçüv şartları da açıq-aydın qayd etilgen. Biz bu imkânnı aerokosmik ücüm silâlarınıñ kütleviy sürette çıqarılmaları ve olarnıñ devlet sıñırımızdan keçkenleri aqqında işançlı malümat alğan soñ baqıp çıqacaqmız. Men strategik ve taktik uçaqlarnı, kruiz raketalar, dronlar, gipersonik ve diger uçaqlarnı közde tutam», – dedi Putin.
Rusiyeniñ Ukrayinağa qarşı cenkine bağlı olaraq ğarbiy memleketler Rusiyeniñ taktik özek silâsını qullanuv ihtimali aqqında bir qaç kere qorqularını bildirgen ediler. Moskva böyle imkânnı doğrudan-doğru red etmedi. Rusiye prezidenti Vladimir Putin özek doktrinasını qayd etip, oña köre, «Rusiyeniñ öz barlığı» telüke altında olğanda özek silâsını qullanmaq mümkün. Şimdige qadar, özek silâsını qullanmaq içün bir sebep yoq edi, dedi o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
