Rusiye prezidenti Vladimir Putin «mahsus arbiy operatsiya» (Rusiye Ukrayınağa qarşı cenkini böyle adlandıra – QA) vaqtında ordu ya da «arbiy birleşmelernen» añlaşma tizgen çetel vatandaşlarını Rusiye Federatsiyasınıñ vatandaşlığına qabul etüv fermanını imzaladı, dep bildirdi yanvarniñ 4-nde TASS resmiy haber agentligi.
Añlaşma eñ az bir yıllıq olmalı. Arbiylerden ğayrı qoranta azaları da vatandaşlıq ala bile – ömür arqadaş, bala ve ana-babaları.
2022 senesi sentâbr ayınıñ soñunda Putin Rusiye ordusında hızmet yapmaq içün bir yıllıq añlaşma tizgen çetel vatandaşlarına qolay yolnen (oturuv izni almayıp ve Rusiyede beş yıl yaşamayıp) vatandaşlıq aluv buyruğını imzalağan edi. Bundan evel añlaşma boyunca eñ az üç yıl hızmet etmek kerek edi.
2022 senesi noyabr ayında, «paydaş» seferberlik ilân etilgeninden bir buçuq aydan soñ, Putin çetel vatandaşlarına Rusiye ordusında Rusiye vatandaşlarınen bir seviyede askerlik yapmağa imkân bergen buyruq imzalağan edi.
2023 senesi yazdan başlap polis Rusiye regionlarında vatandaşlıq alğan, amma arbiy komissarlıqqa yazılmağan çetel vatandaşlarını qıdırıp başladı. Avgust ayında Sankt-Peterburgda, noyabr ayında Voronejde reyd yapıldı, oktâbr ayında ise Moskvadaki camide insanlar tutuldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
