Rusiye prezidentiniñ spikeri Dmitriy Peskov, Vladimir Putin Ukraina etrafındaki vaziyet ve Moskva içün «telükesizlik kefaletlerinen» bağlı muzakereler keçirmege azır, dep bildirdi. Peskov bunı CNN Amerika telekanalına ayttı.
«Birinciden, prezident Putin er vaqıt muzakere ve diplomatiya talap etti. Ve Rusiyeniñ telükesizlik kefaletleri meseleleriniñ teşebbüsçisi oldı. Ukraina – Rusiye içün telükesizlik kefaletleri problemleriniñ tek bir qısmı ve, ebet, prezident putin muzakere keçirmege azır», – dedi Peskov.
Devlet departamenti bildirgenine köre, ABD, Putin ücüm qararını aldı, dep tüşünmey ve Rusiyeni kerginleştirüvden vazgeçmesine çağıra.
ABD tahminlerine köre, fevralniñ 13-nde Ukraina yaqınlarında Rusiye arbiyleriniñ sayısı 100 000-den 130 000-ge arttı.
Conflict Intelligence Team tedqiqatçılar gruppası Ukraina sıñırlarında olğan Rusiye ordusını taqip etüv esasında Rusiye ordusınıñ Ukrainağa qarşı ücüm azırlıqları aman-aman yekünlendi ya da eñ yaqın künleri bitecek, dep bildirdi.
ABD ve bir sıra diger memleketniñ resmiy vekilleri bu afta Rusiyeniñ Ukrainağa ücüm etüv ihtimalı büyük, dep bildirgen edi. Haber vastaları istihbarattaki menbalarğa esaslanıp, künlerni bile aydınlattı – meselâ, Spiegel alman neşiri fevralniñ 16-sı aqqında aytqan edi. Aynı vaqıtta qayd etilgenine köre, Rusiye ücüm etmege cesaret etermi alâ daa belli degil. Ğarp memleketleriniñ liderleri diplomatiya yolu ola bile, dep ayta.
Rusiye ücüm planlarını inkâr ete. Rusiye Mudafaa naziri Sergey Şoygu fevralniñ 14-nde prezident Vladimir Putinnen körüşip, şimdi büyük talimler keçirile, amma çoqusı tezden yekünlenecek, dep ayttı.
