Rusiye prezidenti Vladimir Putin Ukrayina prezidenti Volodımır Zelenskıynen barışıq añlaşmasını imzalamağa azır olmağanını bildirdi. Kreml yolbaşçısı Ukrayina yolbaşçısını «qanunsız» dep adlandırdı ve tek Yuqarı Radanı Ukrayinanıñ qanuniy akimiyet organı dep sayğanını açıqtan-açıq bildirdi.
«Er kesnen muzakere keçirmek mümkün, amma qanunsızlığı sebebinden onıñ [Zelenskıynıñ] imza qoymağa aqqı yoq. Muzakerelerde iştirak etmege istese, men bu muzakerelerni alıp baracaq adamlarnı tayin eterim», – dedi Putin «Rossiya 1» kanalına.
Böylece Putin öz fikrini tekrarladı, Ukrayina prezidenti, onıñ fikirince, memlekette saylavlar vaqtında keçirilmegeni sebebinden öz vazifesinde qalıp olamay.
Putinniñ öz saylavınıñ qanuniyeti Rusiye muhalifeti tarafından daima şübhege oğratıla, aprel ayında Avropa parlamenti Avropa Birligini Rusiyedeki prezident saylavlarınıñ neticelerini tanımamağa çağırdı.
Putinniñ aytqanına köre, ğarbiy memleketler Ukrayinağa maddiy ve arbiy yardımnı toqtatsa, zıddiyet eki ay içinde biter.
Bundan ğayrı, Rusiye prezidenti cenk başlamazdan evel Moskva, bildirgenine köre, Ukrayina Silâlı Quvetlerine Donetsk ve Lugansk vilâyetlerinden çıqmağa teklif etken edi, dep ayttı. Putinniñ bildirgenine köre, Kyiv o vaqıt çıqmağa razı olsa edi, cenk olmaz edi.
Putin 2022 senesi baarde Zelenskıynen şahsiy körüşüvge azır olğanını ve ABDniñ sabıq prezidenti Joe Bidenge «uyğun signallar yollağanını» ayttı.
Zelenskıynıñ müddeti keçken yılnıñ mayıs ayında bitti. Rusiye tarafı bunı devamlı olaraq ğayrı qanuniyet aqqında aytmaq içün qullana. Kyiv cenk vaqtında Zelenskıy devlet yolbaşçısı olaraq qalacaq dep qarar aldı, çünki cenk vaqtında Ukrayinada saylavlar keçirmek imkânsız olur edi.
2022 senesi oktâbr ayında Rusiye Ukrayinanıñ dört regionını ilhaq etkenini ilân etken soñ, Zelenskıy Putinnen muzakere keçirmege yasaqlağan qararnı imzaladı. Yanvarniñ 26-nda Zelenskıy bu qarar özünden ğayrı er keske ait olğanını aydınlattı. «Men Ukrayina prezidenti olam, er angi muzakerelerniñ yolbaşçısı olam, qalğan er kesni yasaqladım», – dep qayd etti o.
Vladimir Zelenskıy ABD prezidenti Donald Trump cenkni er kesten tez bitire bile, dep bildirgen edi.
Zelenskıynıñ aytqanına köre, adaletli barışıqqa irişmek içün bütün taraflarnıñ istegi kerek, amma Vladimir Putin böyle barışıqqa istegini köstermedi. Zelenskıy Ukrayinağa havfsızlıq kefaletlerini bermekniñ müimligini de qayd etti, onıñ fikrince, bunı Avropa ve ABD temin etmeli.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
