Rusiye prezidenti Vladimir Putin Moskva civarındaki «Crocus City Hall» kontsert salonında olğan ücümden aman-aman bir kün keçken soñ ilk sefer açıq beyanat yapıp, ücüm etkenlerniñ areketlerini Ukrayınanen bağladı.
«Tahqiqatnı aytsaq. Şusı bar: dördü de tapılıp yaqalandı. Saqlanmağa ve Ukrayınağa doğru ketmege tırışqanlar, evelden olar içün sıñırdan keçüv penceresi azırlanğan edi», – dep ayta Rusiye lideri.
Martnıñ 23-nde saba Rusiye Federal telükesizlik hızmeti de aynısını bildirdi. Bu mahsus hızemtniñ beyanatına köre, «Crocus City Hallda» ücüm etkenler Ukrayınada saqlanmağa tırışt. Rusiye mahsus hızmetleriniñ malümatına köre, ücüm iştirakçileri «Rusiye-Ukrayına sıñırından keçmege planlaştırğan edi» ve «Ukrayına tarafında bağları bar edi».
Beyazrusiyeniñ Rusiye elçisi Dmitriy Krutoy martnıñ 23-nde bildirgenine köre, Beyazrusiye mahsus hızmetleri Rusiyege Moskva civarındaki terakt iştirakçilerini yaqalamağa tırıştı, esas vazife ise «umumiy sıñırımızdan keçmege imkân bermemek» edi.
Rusiye Tahqiqat komiteti dört şübhelini Rusiyeniñ Brânsk vilâyetinde yaqaladı.
Martnıñ 22-nde aqşam, terakttan soñ ilk saatlarda, Ukrayına akimiyetiniñ vekilleri Kyivniñ Moskva civarındaki ücümge alâqası yoq, dep bildirdi.
Bu aqta Ukrayına prezidenti ofisiniñ yolbaşçı mesleatçısı Mıhaylo Podolâk ve Ukrayına Tış işler nazirligi bildirdi.
«Böyle qabaatlavlarnı Rusiye cemiyetinde Ukrayınağa qarşı baqışlarnı arttırmaq, devletimizge qarşı cinaiy istilâda iştirak etecek Rusiye vatandaşlarınıñ seferberligini quvetleştirmek ve halqara toplulıq közünde Ukrayınanı itibardan tüşürmek maqsadınen Kremlniñ planlaştırılğan provokatsiyası dep sayamız», – dep aytıla Tış işler nazirliginiñ beyanatında.
Ukrayına Tış işler nazirligi «Rusiye rejiminiñ 1999 senesi Kaşirskoye yolundaki terakt kibi qanlı provokatsiyalarnıñ uzun bir tarihı bar», dep hatırlattı.
Martnıñ 22-nde aqşam kamuflâjlı urbada bir qaç insan kontsert salonında avtomatlardan ateş açıp, binanı ateşke berdi.
Rusiye Tahqiqat komiteti terakt maddesine istinaden cinnaiy tahqiqat başlattı. Rusiye kütleviy haber vastaları bildirgenine köre, terakttan soñ ücüm etkenler maşinada saqlandı.
«Agentstvo» neşiri qayd etkenine köre, «Crocus City Hallğa» qarşı ücüm – 2004 senesinden berli 300-den çoq insan elâk olğan Beslan mektebindeki ücüm vaqtından Rusiyede eñ büyük terakttır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
