Rusiye prezidenti Vladimir Putin Rusiye vatandaşlığını aluv esnasını qolaylaştırğan qanunnı imzaladı. Uquqiy malümat resmiy portalında derc etilgen qanun leyhasına binaen, artıq çetel vatandaşları içün Rusiye vatandaşlığını qabul etkende öz vatandaşlığından vazgeçmek şart degildir, dep haber ete «Nastoyaşçeye Vremâ».
Rusiye vatandaşlığını aluv esnası Sovetler Birligi vatandaşlığı olğan ve sabıq sovet cumhuriyetlerinde yaşağan insanlar içün qolaylaştırıldı. Endiden soñ Rusiye vatandaşlığına kirüv arizasını bermezden evel Rusiyede üç yıl yaşamaq ve resmiy kelir menbasını tasdıqlamaq şart degildir.
Rusiyede yaşav izni olğan Moldova, Ukraina, Beyazrusiye ve Qazahistan vatandaşları memlekette yaşav müddetinen bağlı talaplarğa riayet etmeyip, vatandaşlıq içün vesiqalarını bere bile.
Rusiye aliy oquv yurtlarınıñ mezunları da Rusiye vatandaşlığını almaq içün artıq üç yıl çalışmağa mecbur degil, bir yıl yeterli ola.
Rusiye vatandaşlarınen evli olğan, memlekette yaşağan ve balaları olğan çetel vatandaşları içün talaplar qolaylaştırıldı.
Anası ya da babası Rusiye vatandaşı olğan çetel vatandaşları içün de esnas qolaylaştırıldı.
Qanun üç aydan soñ işke tüşürilecek.
Yañı migratsion siyaseti sayesinde akimiyet Rusiyege 5 milliondan 10 millionğa qadar insannı celp etip, eali sayısınıñ eksilmesini toqtatacaq ola. Qanun leyhasınıñ müellifleri, olarnıñ aytqanına köre, çetelde yaşağan rus icretçileri Rusiye pasportlarını alsın istedi.
