Rusiye prezidenti Vladimir Putin mayısnıñ 9-nda arbiy parad vaqtında Ğarpqa «ahiret künü» aqqında tenbi yollamağa niyetlene, dep yaza Reuters agentligi.
Agentlik Rusiye Federatsiyasınıñ Mudafaa nazirligine esaslanıp, paradda İl-80 – özek cenki çıqsa, Rusiye Federatsiyasınıñ eñ yüksek reberligini taşıycaq uçaq iştirak etecek, dep bildirdi.
İL-80 – «ahiret künü uçağı» – 2010 senesinden ilk sefer uçacaq.
Rusiye Mudafaa nazirligi Rusiyeniñ Ekinci cian cenkindeki ğalebeniñ 77 yılına bağışlanğan paradından 11 biñ arbiy, 131 silâ, arbiy ve mahsus tehnika, 77 uçaq ve vertolöt iştirak etecek. Paradda çetel musafirleri olmaycaq.
Ukraina Mudafaa nazirligi Rusiyede mayısnıñ 9-nda Zafer künü qayd etilgeni içün Rusiye arbiyleri provokatsiya yapa ya da Ukrainağa qarşı daa çoq ateş aça bile, dep tüşüne.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
