Rusiye prezidenti Vladimir Putin mart ayınace Donetsk ve Lugansk vilâyetlerini zapt etmege buyurdı, dep bildirdi Ukrayina Mudafaa nazirligi Baş istihbarat idaresiniñ temsilcisi Andriy Çernâk.
Çernâknıñ sözlerine köre, Rusiyeniñ yañı bir büyük ücümge ve memleketniñ şarqını zapt etmege yañı azırlanğanına dair işaretler bar.
"Biz Rusiye işğal ordusı şarqqa taba qoşma ücüm taqımlarını, bölüklerini, silâlarnı ve arbiy tehnikanı yerleştirgenini köremiz. Ukrayina arbiy istihbaratınıñ malümatına köre, Putin mart ayınace Donetsk ve Lugansk vilâyetlerini zapt etmege buyurğan", - dep bildirdi Çernâk.
Bundan ğayrı o, Rusiye seferber etilgen askerlerini azırlamaq içün Belarus territoriyasını qullanğanını ve yaqın aftalarda bu yönelişte Ukrayinağa ücüm etmek içün kerekli qadar quveti olmağanını qayd etti.
Bugünde Donetsk ve Lugansk qattı qurşı turuv rayonlardan birilerdir.
Ukrayina Mudafaa nazirliginiñ Baş istihbarat idaresinde, Ukrayina cenkniñ "pek faal safhası" arfesinde olğanını bildireler.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
