Rusiye prezidenti Vladimir Putin Frenkistan lideri Emmanuel Makron ile keçirgen brifing vaqtında «Qırımnı cenk yolunen qaytaracaq olsalar», Rusiyeniñ NATO ile zıddiyet telükesi bar, dep ayttı.
Putin, Frenkistan da olğan Avropa memleketleri Qırımnı Ukrainanıñ bir qısmı olaraq saya, Moskva ise ilhaq etilgen yarımadanı «Rusiye» dep saya, dep bildirdi.
«Bu vaziyetni cenk yolunen deñiştirmege tırışsalar, Ukrainanıñ doktrina vesiqalarında Rusiye duşman ve Qırım cenk yolunen qaytarıla bile, dep yazılğan, ve bir tüşüniñiz, Ukraina NATO azası olsa, 5-inci madde (NATOnıñ kollektiv mudafaası NATO azalarından birine ücüm etüv bütün NATO azalarına ücüm olaraq tanılacaq – QA) ise lâğu etilmedi. Prezident Biden yaqında 5-inci madde imperativ olğanını ayttı. Ve yerine ketirilecek. Rusiye ve NATO arasında cenk çıqar, demek. NATOnen cenkleşecekmizmi? Ve ekinci mesele: Rusiyenen cenkleşmege isteysiñizmi? Frenkistan Rusiyenen cenkleşsinmi? Amma öyle olacaq!», – dedi Putin.
Fevralniñ 7-nde Putin Frenkistan lideri Emmanuel Makron ile beş saatlıq körüşüv keçirdi, Ukraina sıñırlarındaki vaziyet ve Moskvanıñ NATO tarafından «telükesizlik kefaletleri» talapları muzakere etildi. Makron soñki afta içinde Putinnen üç kere telefonda laf etti. Salı künü Frenkistan prezidenti Kyivge ketti.
Fevralniñ 1-nde Rusiye prezidenti Vladimir Putin, Ukraina NATOğa kirse, Qırımnı küç qullanıp qaytarmağa tırışacaqlar, dep tahmin etti.
Ukraina Milliy telükesizlik ve mudafaa şurasınıñ kâtibi Oleksiy Danılov Putinniñ aytqanlarını izaatlap, Kyiv içün «Qırım meselesi çezilmedi», Ukraina akimiyeti onı nasıl bir yolnen qaytaracaq, vaqıt kösterir, dep ayttı.
Ukraina Silâlı quvetleriniñ baş komandanı general-leytenant Valeriy Zalujnıy Ukraina vaqtınca işğal etilgen Donbast topraqları ve Qırımnı cenk yolunen qaytaruv variantlarını baqmay, dep bildirdi.
Yanvarniñ 31-nde BM Ukraina vekili Serğiy Kıslıtsâ BM Havfsızlıq şurasınıñ toplaşuvında Kyivniñ işğal etilgen Donbas topraqlarına ve Rusiye işğal etken Qırımğa ücüm etmege niyeti yoq, dep bildirdi.
ABD işleri Ukraina vekâletlisi Kristina Kvin Putinniñ aytqanlarını izaatlap, Ukraina ya da başqa memleketlerniñ NATOğa kirmesi Rusiyeniñ işi degil, ABD ise Qırımnı Ukrainanıñ bir qısmı olaraq saymağa devam ete, dep bildirdi.
