Rusiye prezidenti Vladimir Putin Macaristannı Ukraina ile azırlanğan cenk aqqında tenbilegen edi, Budapeşt Ukraina toprağınıñ bir qısmını alıp olur, dep tüşündi. Bu aqta Ukraina milliy telükesizlik ve mudafaa şurasınıñ kâtibi Oleksiy Danilov milliy telemarafon yayınında ayttı, dep bildire TSN.
Memur bu malümatnıñ menbasını aydınlatmadı. O, Macaristan da azası olğan NATOğa kirüv imkânları aqqında sualge cevap berdi.
«Bu cenkten soñ bu memleketler içün nasıl aqibetler olacaq baqarmız», – dedi Danilov. Budapeşt bu beyanatlarnı haber derc etilgende izaatlamadı.
Rusiyeniñ Ukrainağa qarşı cenki başlağan soñ Kyiv ve Budapeşt munasebetleri bayağı suvudı. Faqat ondan evel de taraflarnıñ añlaşamamazlıqları bar edi. Budapeşt Kyivni Ukraina ğarbinde etnik macar azlığını ezgeninde qabaatlağan edi, Ukraina akimiyeti Viktor Orbannıñ ükümetini Zakarpattâda pasport bergeninde ve Kremlnen sıqı işbirliginde qabaatlağan edi.
Aprelniñ başında Macaristanda parlament saylavları olıp keçti, Ukrainadaki cenk mevzusı Orban ve muhalifet arasında esas munaqaşa meselelerinden biri oldı.
Muhalifet baş nazirni Moskva ile işbirligi sebebinden milliy menfaatlarnı satqanında qabaatladı, o ise, Budapeştni Rusiyeniñ Ukrainağa qarşı cenkine kirsetmege tırışalar, dep ayttı. Saylavlarda ğalebe qazanğan soñ Orban Ukraina prezidenti Volodımır Zelenskıy saylavlarda küreşmege mecbur olğan raqiplerden biri oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
