Link açıqlığı

Saatnıñ esas haberi

Putin Lavrovğa Erdoğannıñ Qırım ziyaretiniñ formatını tüşünmege vazife berdi


Türkiye prezidenti Recep Tayyip Erdoğan ve Rusiye prezidenti Vladimir Putin (arhiv fotoresimi)
Türkiye prezidenti Recep Tayyip Erdoğan ve Rusiye prezidenti Vladimir Putin (arhiv fotoresimi)

Rusiye prezidenti Vladimir Putin Rusiye Tış işler naziri Sergey Lavrovğa Aqmescitteki Cuma Cami açılışında iştirak etmek içün işğal etilgen Qırımğa kele bilecek Türkiye prezidenti Recep Tayyip Erdoğannıñ ziyaret formatını tüşünmege avale etti.

Bu aqta Kreml saytında derc etilgen Putinniñ emirlerinde aytıla.

«Rusiye Tış işler nazirligi ve alâqası olğan diniy teşkilâtlar Türkiye Cumhuriyeti prezidentiniñ Aqmescitteki Cuma Cami açılışında iştirak etmek içün Rusiye Federatsiyasına ziyaretiniñ formatını baqmalı», – dep aytıla emir metninde.

Haber etilgenine köre, Sergey Lavrov bu avaleniñ yerine ketirilmesinden mesüliyetli olaraq belgilendi. O, 2019 senesi iyünniñ 1-ne qadar Putinge neticelerni bildirmeli.

Aprelniñ 26-nda belli olğanı kibi, Aqmescitteki yañı Cuma Caminiñ açılış künü iç süslenüviniñ leyhası deñişkeni içün bir yılğa qaldırıldı. Yañı kün – 2020 senesi aprelniñ 21-i.

Rusiye prezidenti işğal altındaki Qırımnı ziyaret etip, bu tedbirge Erdoğannı davet etti, dep bildirdi. Recep Tayyip Erdoğan bunı açıq şekilde daa izaatlamağan edi.

Ukraina musulmanları diniy idaresiniñ müftisi Said İsmagilov musulman din erbaplarını ilhaq etilgen Qırımdaki Cuma Cami açılışını ziyaret etmemesine çağıra.

Leyhağa köre, Aqmescitteki Cuma Cami 5,7 biñ metr kârelik olıp, 2,6 biñ insannı sığdıracaq. İnşaat eki qısımdan ibaret – qubbeli esas bina ve kolonnalı ve abdesthaneli iç azbar. Cami qurucılığı 2016 senesi oktâbr ayında başladı, onı 2019 senesiniñ soñunda bitirmege planlaştırıla.

2018 senesi iyün ayınıñ soñunda Aqmescitte Qırımdaki Cuma Caminiñ büyük qubbesini qurmağa başladılar. Küzde qurucılar beton işlerini bitirip, caminiñ büyük qubbesini qurdı ve binanıñ iç süslenüvine başladı. 2018 senesi oktâbr ayınıñ soñunda camide liftler çalıştırıldı.

XS
SM
MD
LG