Rusiye prezidenti Vladimir Putin dekabrniñ 14-nde canlı bağ ve er yıllıq büyük matbuat konferentsiyasını keçirecek. Bu aqta Kremlniñ matbuat kâtibi Dmitriy Peskov bildirdi.
Bıltır fevral ayında Rusiyeniñ Ukrayınağa qarşı büyük istilâsı başlağanından berli Putin ilk sefer büyük matbuat konferentsiyasını keçirecek.
Tedbir yeri dekabrniñ 1-nde aydınlatılacaq. Canlı bağ sualleri de o vaqıt qabul etilip başlanacaq. Olarnı telefon, mesac ve internet vastasınen qabul etecekler, dep qoştı Peskov.
Keçken sene Rusiye ordusınıñ Ukrayınağa qarşı büyük istilâsı sebebinden Kreml ne canlı bağ, ne de matbuat konferentsiyasını yaptı. The Moscow Times neşiri yazğanına köre, canlı bağ keçirmemek qararını Putin özü aldı – Ukrayına diversiya yapa bile dep.
Başta canlı bağ bu yıl yazda olacaq edi (2017 senesinden berli onı iyün ayında keçire ediler). Lâkin prezident memuriyetindeki menbalar tedbir yılnıñ soñunda olacaq – «cebedeki vaziyet belli olğan soñ» dep bildirgenler.
Bu yıl matbuat konferentsiyası ve canlı bağ prezident saylavları ögünde ötkerilecek, saylavlar qanunğa köre 2024 senesi martnıñ 17-nde olmalı.
RBK qayd etkenine köre, keçken prezidentlik kampaniyası ögünde matbuat konferentsiyası dekabrniñ 14-nde ötkerilgen edi.
RİA «Novosti» Rusiye parlamentindeki menbalarına esaslanıp bildirgenine köre, Rusiye Federatsiya Şurası Rusiyede prezident saylavlarınıñ kününi resmiy şekilde dekabrniñ 13-nde olacaq toplaşuvda belgiley bile.
Dekabrniñ 17-nde «Yedinaya Rossiya» firqasınıñ toplaşuvı olacaq, prezident namzeti olaraq Putin kösterile bile.
Şimdilik Vladimir Putin prezident kampaniyasında iştirak etecegini aytmadı.
Putin ilk sefer 2000 senesi prezident oldı ve dördünci kere bu vazifede qala (2008-2012 seneleri olmadı). Beşinci kere namzet köstermek Putinniñ teşebbüsinen qabul etilgen Anayasa tüzetüvleri imkân bere. Reuters qayd etkenine köre, Putin İosif Stalinden ğayrı, soñki yüz yılda memleketniñ başında eñ uzun vaqıt olğan yekâne kişi ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
