Rusiye prezidenti Vladimir Putin KNDR lideri Kim Çen Innıñ Şimaliy Koreyanı ziyaret etmek davetini qabul etti, dep bildirdi cumaaqşamı künü Şimaliy Koreya devlet kütleviy haber vastaları. Kim çarşenbe «Vostoçnıy» kosmodromında davetini berdi.
Şimaliy Koreya devlet kütleviy haber vastalarınıñ malümatına köre, Putin davetni «seve-seve» qabul etti.
Böyle ziyaret ne vaqıt olacaq aytılmay.
Sentâbrniñ 13-nde Kim Çen In ve Vladimir Putinniñ 4 saatlıq körüşüvinden soñ Şimaliy Koreya lideri Rusiyege «tolu yardımını» vade etti. Putin, Rusiye ve Şimaliy Koreyanıñ «meraqlı leyhaları çoq», amma arbiy işbirligi aqqında aytmadı, dep ayttı. The New York Times gazetası Kim Çen In Putinden kosmik saa ve suvaltı flot içün zemaneviy tehnologiyalar ve sanayı yardım almağa planlaştıra, dep bildirdi. Ğarbiy istihbarat bildirgenine köre, Rusiye Koreya silâ ve snarâd yedeklerini bekley.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
