Rusiye ve Qırım kütleviy haber vastalarınıñ menbalarına esaslanıp bildirgenine köre, Rusiye prezidenti Vladimir Putin Keriç köprüde tren areketini şahsen açacaq.
Daily Storm Rusiye leyhası bildire ki, tren areketiniñ açılışı munasebetinen Putinniñ iştirakinen tantanalı tedbir ötkerilecek.
Kreml, Putinniñ Keriç köprüde tren areketini açmaq planları aqqında resmiy şekilde haber etmey.
2018 senesi Keriç köprüdeki maşina areketini de Putin açqan edi. O, «KamAZ» dümeni başında Tamandan Keriçke keçti.
Daa evel Keriç köprüden keçecek Qırım yolcu tren biletleriniñ satışı başlandı, dep haber etildi. Sankt-Peterburgdan Aqyarğa yol alacaq ilk tren dekabrniñ 23-nde çıqacaq.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
Avropa Birligi ve ABD Rusiye ve işğal altındaki Qırım arasındaki Keriç köprüniñ qısmen açılışını takbih etti. Ukraina tarafı 2014 senesi Qırım ilhaq etilgen soñ Rusiye ile köpür qurucılığı añlaşmasından çıqtı.
2014 senesi iyül ayında Ukraina ükümeti ilhaq etilgen Qırımdaki bütün limanlarnıñ işini resmiy şekilde toqtatqan edi.
