Rusiye prezidenti Vladimir Putin dekabrniñ 30-nda Amerika lideri Joseph Biden ile telefonda laf etmege niyetlene. Bu aqta CNN ABD Milliy telükesizlik şurasınıñ vekili Emili Hornnıñ malümatına esaslanıp bildire.
Qayd etilgenine köre, subetni Rusiye prezidenti istedi. Emili Hornnıñ aytqanına köre, Biden razı oldı, çünki «Rusiye olsa, liderler arasında dialogdan ğayrı başqa bir şey olamaz, dep tüşüne».
Milliy telükesizlik şurasınıñ vekili, «Bidenniñ memuriyeti Ukraina sıñırında Rusiye arbiy küçüniñ arttırıluvına cevap olaraq umumiy yanaşuvnı koordinatsiya etmek içün Avropa ittifaqdaşlarınen faal mesleat keçirmege devam ete», dep qayd etti.
Dekabrniñ 17-nde Rusiye akimiyeti telükesizlik kefaletlerinen bağdı eki teklif leyhasını taqdim etti. Bir vesiqa NATOğa, ekincisi ABDge yollanıldı. Moskvanıñ esas talabı – NATOnıñ Şarqqa kenişlemekten vazgeçüv, hususan eski sovet cumhuriyetlerini teşkilâtnıñ yañı azalarına qoşmaq ve anda arbiy bazalarnı yerleştirmekten vazgeçüv.
Moskva, Rusiye akimiyetini Ukrainağa istilâ azırlağanında ve onıñ sıñırlarına arbiy tehnikanı yollağanında qabaatlağan Ğarp ile yañı keskin munasebet kerginleşüvi sebebinden oña kefalet berilsin dep, israr ete. ABD akimiyeti Rusiye Ukraina suverenitetine kene qast etse, Moskva emsali olmağan sert sanktsiyalarğa oğraycaq, dep tenbiledi. Bidenniñ memuriyeti Rusiye ile muzakereler keçirmege azır olğanını bildirdi.