Roskomnadzor, Rusiye prezidenti memuriyetiniñ vekilleri ve Baş prokuratura Rusiye kütleviy haber vastalarınıñ baş muarrirlerinen qapalı körüşüv keçirdi. Memurlar jurnalistlerge akimiyetni aqaretlev qanunı nasıl qullanılacağını añlatmağa tırıştı. Bu aqta BBC rus bürosı körüşüvniñ gizli iştirakçileriniñ malümatına esaslanıp bildire.
Jurnalistlerge qanun «mantıqlı» ve «belli bir şekilde» qullanılacaq, dep aytıladı. Memurlar Roskomnadzor saytlarnı başta tenbileycek, dep vade etti, örnek olaraq 76.ru ve «Yarkub» neşirleriniñ blok etilüvi kösterildi.
Jurnalistler matbuatta «Putin – hırsızdır» ve «Yedinaya Rossiya – yalancı ve hırsızlar» ibareleri qunnalına bile dep soradı. Bu şiarlar muhalifetniñ aktsiyalarında, hususan Aleksey Navalnıy tarafından sıq-sıq seslendirile. Roskomnadzor vekili onıñ fikirince bu aqaretlev ola, dedi, amma buña prokuratura qıymet kesecek. Memurlar bu sualge tam bir cevap bermedi.
«Devlet dumasını aqaretlemege olmay, amma deputatlarnı aqaretlemege mümkün», – dep ayttı körüşüv iştirakçilerinden biri.
BBC malümatına köre, prezident memuriyetinden körüşüvde prezident idaresiniñ cemaat leyhaları yolbaşçısı Sergey Novikov ve onıñ muavini, Lenta.ru sabıq baş muarriri Aleksey Goreslavskiy bar edi. Roskomnadzornı yolbaşçı muavini Vadim Subbotin temsil etti.
Roskomnadzor ve Baş prokuratura BBC malümatını daa izaatlamadı.
Mart soñundan itibaren Rusiyede internette yalan haberlerniñ tarqatılması ve akimiyet ve devlet timsallerini aqaretler içün mesüliyet qanunı çalışa.
Birinci qanun internette cemaat içün müim olğan malümatnıñ doğru haber şeklinde vatandaşlarnıñ ayatı ve sağlığı içün telükeli olğan yalan haberlerniñ tarqatılmasını yasaqlamaqta. «Yañlış» malümat paylaşqan vatandaşlarnı 100 biñ ruble, memurlarnı 200 biñ rublege qadar, şirketlerni ise yarım million rublege qadar para cezası bekley.
Akimiyetni ve devlet timsallerini aqaretlev içün vatandaşlar 100 biñ rublege qadar para cezasınen ya da 15 kün memuriy apis cezasınen cezalana. Tekrar bozuv olsa, para cezası 200 biñ rublege qadar arttırıla bile.
Prezidentniñ insan aqları şurası ve diger aq qorçalayıcı teşkilâtlar qanun leyhalarını lâğu etmege çağırğan edi.
Aq qorçalayıcılarnıñ fikirince, Rusiyeniñ yañı qanunı esasında qırımlılar Rusiye akimiyeti, Rusiye timsallerine sayğısız yanaşqanı ve ukrain kütleviy haber vastalarınıñ haberlerini paylaşqanı içün ceza ala bile.
