Rusiye prezidenti Vladimir Putin noyabrniñ 15-16-nda İndoneziyadaki G20 sammitine barmaycaq. Bu aqta Bloomberg aydınlatılmağa menbalarğa esaslanıp bildire.
Neşirniñ malümatına köre, Putin yerine sammitke Rusiye Tış işler naziri Sergey Lavrovnı yollaycaqlar.
Rusiye Tış işler nazirligi ve Kreml temsilcileri izaat muracaatlarına şimdilik cevap bermedi.
Bloomberg, Kreml Putinni "yüksek seviyeli kerginlikten" qorumağa tırışa, Rusiye prezidentinden Avropa liderleri uzaq olacaqtır, dep qayd ete.
Rusiye prezidentiniñ vekili Putin bu aftanıñ soñuna qadar G20 sammitinde iştirak etip etmeycegine dair qarar alacaq, dep bildirdi.
İndoneziya prezidenti Coko Vidodonıñ avgust ayında bildirgenine köre, Vladimir Putin G20 memleketleri sammitinde şahsen iştirak etmege niyetlene. Ukrayına onıñ "Büyük Yigirmi" sammitinde iştirak etmesi Rusiye lideri anda olıp olmaycağına bağlı, dep bildirgen edi.
Noyabrniñ 8-nde Ukrayına prezidenti Volodımır Zelenskıynıñ spikeri "Gruppa 20" sammitinde, büyük ihtimalnen, online formatında iştirak etecekler, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
