Qırımda «referendum» keçirilmesiniñ beşinci yılında Qırımnıñ esas Ukraina ile memuriy sıñırındaki «Çonğar» keçiş noqtasında Rusiyeniñ Ukrainağa qarşı istilâsına tirenüvge bağışlanğan sergi açıldı. Bu aqta Qırım.Aqiqat mühbiri haber ete.
«Elbette, işğalniñ beş yılı endi az degil. Nasıl olsa da, küreş devam ete. Bütün küçümiznen duşmannıñ istilâsına qarşı turmağa tırışamız. Qırımnıñ işğaline iç bir vaqıt razı olmaycağımıznı ve küreşimiz devam etecegini kösteremiz», – dep ayttı Herson regional Meclisiniñ reisi Lenur Lümanov jurnalistlerge.
Sergide dizayner Andrey Yarmolenkonıñ yazuvlı şiarları taqdim etildi: «Putin, evine ket!», «Qırım bizim», «Qırım serbest olacaq» ve ilâhre.
«Beş yıl evelsi, martnıñ 16-nda, Rusiye Ukrainağa bağlı Qırımda sahte referendum keçirip ve bu topraqnı özüne has dep sayıp, masqaralıq tarihına kirdi. Biñlernen ukrainalı normal yaşayıştan marum etildi. Topraqlar Ukraina terkibine qaytqanına qadar bu bizim umumiy acımız», – dep qayd etti sergi açılışında Geniçesk rayon devlet memuriyetiniñ yolbaşçısı Aleksandr Vorobyev.
İşbu sergi «Korpus spravedlivosti» cemaat teşebbüsi, Qırımtatar Resurs Merkezi ve #LIBERATECRIMEA Qırımnı işğalden qurtaruv ve qırımtatar halqı ile birdemlik halqara cemaat areketiniñ teşebbüsinen yerli memuriyet, Ukraina Devlet sıñır hızmeti ve Herson regional Meclisiniñ yardımınen teşkil etildi.
Sergi martnıñ 31-ne qadar açıq olacaq. Soñra yazuvlı şiarlarnı yerli müzeyge bermege planlaştıralar.
#LIBERATECRIMEA – Qırımnı işğalden qurtaruv ve qırımtatar halqınen birdemlik içün halqara cemaat areketidir. O, «Qırımnıñ qanunsız işğali, halqara uquqnıñ qaba bozulması ve 2014 senesi fevral ayından berli Qırımda sayısız insan aqları bozuvlarınıñ ilk sebebini toqtatmağa» çağırğan vatandaş cemiyetiniñ sesini yükseltmege yönelgendir.
