RF prezidenti Vladimir Putin Türkiye devlet başı Recep Tayyip Erdoğannıñ zahire añlaşması ile bağlı muzakereler keçirmege tekliflerini körmemezlikke ura. Bunı The Wall Street Journal neşri diplomatlar ve talilcilerniñ sözlerine atfı etip bildire.
Erdoğan soñ aftalarda Ukrayina zahiresiniñ Qara deñiz limanlarından taşılmasına izin bergen añlaşmanıñ devam ettirilmesi mevzusında Putin ile laf etmek istegenini defalarca ayttı. Şimdilik Türkiye ve Rusiye prezidentleri telefondan daa laf etmedi. Diplomatlarnıñ sözlerine köre, Türkiye akimiyeti bu meseleni Kremlnen diger yollar vastasınen çezmege tırışa.
Rusiye zahire añlaşması Erdoğan Rusiye reberligini "açuvlatqanı" içün devam ettirmekten red etken. İyül ayında Erdoğan cenkniñ soñunaca Türkiyede bulunmaq kerek olğan "Azovstal" imayecilerine Ukrayinağa qaytmağa izin berdi.
Zahire añlaşması iyülniñ 17-nde toqtatıla, dep bildirdi Kreml matbuat kâtibi Dmitriy Peskov. Onıñ aytqanına köre, añlaşma çerçivesinde Rusiye talap etken şartlar yerine ketirilmegen.
Bu añlaşma aman-aman bir yıl evelsi, 2022 senesi iyülniñ 22-nde, o vaqıt endi bir qaç ay devam etken Rusiyeniñ Ukrayinağa qarşı büyük silâlı istilâsı bütün dünyada aşlıq fiyatlarını arttırğan soñ imzalanğan edi.
Büyük istilâ başlağanınen Rusiye Ukrayinanıñ zahire satışlarını blok etip başladı. Rusiye gemileri Qara deñizde turıp, diger dünya limanlarına zahire taşığan çeşit memleketlerniñ gemilerine yol bermey edi. Şimdi Rusiye bu añlaşmanı uzatmağa istemey. Zahire añlaşması sayesinde dünyadaki aşlıq fiyatları stabilleşken ve em Ukrayina zahiresi, em Rusiye aşayt mahsulatlarınıñ ihrac etilüvine imkân berilgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.,
