Link açıqlığı

Saatnıñ esas haberi

Putin Erdoğannı Qırımğa cami açılışına davet etti, dep bildire


Vladimir Putin ve Recep Tayyip Erdoğan (arhiv fotoresimi)
Vladimir Putin ve Recep Tayyip Erdoğan (arhiv fotoresimi)

Rusiye prezidenti Vladimir Putin Türkiye prezidenti Recep Tayyip Erdoğannı işğal altındaki Qırımnıñ yañı Cuma Cami açılışına davet etti, dep bildirdi. Bu aqta Putin martnıñ 18-nde Aqmescitte cemaatçılıq vekillerinen körüşip ayttı.

Onıñ bildirgenine köre, ziyaret qararı Erdoğannıñ işine bağlı. Aynı vaqıtta Putin dey ki, Türkiye prezidenti bu teklifke «pek müsbet» baqtı.

«Vaqtı (Erdoğannıñ – QA) olacaqmı, kelmege çaresi olacaqmı, buña bağlı. Bu munasebetlerni inkişaf ettirecekmiz», – dep yaza Putinniñ aytqanlarını Rusiye kütleviy haber vastaları.

Erdoğannı Qırımğa davet etmege Putin ile körüşken Rusiye altındaki Qırım müftisi Emirali Ablayev teklif etti.

Recep Tayyip Erdoğannıñ bunıñnen bağlı açıq izaatları daa olmadı.

Leyhağa binaen, Aqmescitteki Cuma Cami 5,7 biñ metre kârelik olacaq, 2,6 biñ insannı sığdıracaq. Cami eki qısımdan ibaret – qubbeli esas bina ve kolonna ve abdesthaneli arqa azbar.

Cami 2016 senesi oktâbr ayından berli qurula, qurucılıq işlerini 2019 senesiniñ soñunda bitirmege planlaştırıla.

2018 senesi iyün ayınıñ soñunda Aqmescitte Qırım Cuma Camisiniñ büyük qubbesini qurıp başladılar. Küzde qurucılar beton işlerini, büyük qubbe qurulışını bitirip, binalarnıñ içini yapıp başladılar. 2018 senesi oktâbrniñ soñunda camide liftler bağlandı.

XS
SM
MD
LG