Rusiye prezidenti Vladimir Putin esirlerni ve elâk olğanlarnıñ cesedlerini deñiştirmek içün Dağlıq Qarabağda cenk uruşlarını toqtatmağa çağırdı. Bu aqta Kremlniñ matbuat hızmeti haber ete.
Putin bunı Azerbaycan prezidenti İlham Aliyev ve Ermenistan baş naziri Nikol Paşinân ile bir sıra telefon subetini kerçekleştirgen soñ ayttı.
Rusiye prezidenti oktâbrniñ 9-nda Moskvağa Azerbaycan ve Ermenistan Tış işler nazirlerini Rusiye Tış işler naziri Sergey Lavrovnıñ yardımı ile mesleatlar içün davet etti, dep haber ete Azatlıq Radiosı.
Jenevada oktâbrniñ 8-nde OSCE Minsk gruppasınıñ reisdeşleri Rusiye, Frenkistan, ABD arasında zıddiyetni al etüv mesleatları başlandı. Azerbaycan Tış işler naziri Ceyhun Bayramov da mesleatlarda iştirak etti.
Azerbaycan Tış işler nazirligi ateş toqtatılmaycaq, dep bildirdi, prezident Aliyev ise Ermenistan Qarabağdan ordunı çıqaruv cedvelini teklif etmeli, dep tekrarladı – ve tek bundan soñ Minsk gruppasınıñ laf etecek şeyi olacaq.
Azerbaycan ve Ermenistan arasındaki zıddiyetniñ faal fazası sentâbrniñ 27-nde başladı. Yañıdan başlağan cenk uruşları 1994 senesi ilân etilgen barışıqtan soñ eñ ciddiy dep adlandırıla. Erivan ve Baqu bir-birini zıddiyetni kerginleşkeninde qabaatlay. Eki taraftan da elâk olğan ve yaralanğanlar bar, olarnıñ arasında vatandaşlar da bar.
Azerbaycan ve Ermenistan arasında Dağlıq Qarabağ zıddiyeti Sovetler Birliginiñ soñki yıllarından berli devam ete. Ealiniñ ekseriyeti ermeni olğan region 1991 senesi Azerbaycandan mustaqil olğanını ilân etti, amma iç bir memleket bunı qabul etmedi. Şimdi Dağlıq Qarabağ ve oña yaqın bir qaç region ermeni küçleriniñ kontroli altında buluna.
