Rusiye prezidenti Vladimir Putin BMT-nıñ baş kâtibi Antonio Guterres ile körüşken soñ Mariupoldeki "Azovstal" zavodınıñ tahliyesine razı oldı.
"Yüzme-yüz körüşüv vaqtında baş kâtip BMT-nıñ Ukrayinağa dair noqta-i nazarını tekrarladı, ve olar (Guterres ve Putin - muar.) gumanitar yardım ve munaqaşa mıntaqalarından silâsız adamlarnıñ tahliyesi ile bağlı tekliflerni, hususan Mariupoldeki vaziyetni muzakere ettiler. Przeident Mariupoldeki "Azovstal" zavodından vatandaşlarnıñ tahliyesinde BMT ve Halqara Qızıl Haç komitetiniñ iştirak etsemine razı oldı", - dep bildire BMT matbuat hızmeti.
Qayd etilgeni kibi, kelecek aytışmalar BMT-nıñ Gumanitar meseleleri koordinatsiyası ofisi ve Rusiye Mudafaa nazirligi arasında olacaq.
Aprelniñ 26-nde Birleşken Milletler kâtibi Antonio Guterres Rusiye prezidenti Vladimir Putin ile körüşti.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
