Talilciler qayd etkenine köre, Putin Rusiye kimsege «razılıq bermeycek» ya da kelecek barışıq muzakerelerinde er angi uzlaşuvğa barmaycaq. Putin, Rusiye oña kelişken ve uzun müddette barışıqnı temin etecek barışıq añlaşmasını saylamalı, dep qoştı.
«Putin Rusiye barışıq muzakerelerinde «öz» topraqlarından «vazgeçmeycek», dep bildirdi – büyük ihtimalnen, qanunsız ilhaq etilgen Ukrayinanıñ işğal etilgen topraqları aqqında aytıla», – dep qayd etile esabatta.
Rusiye Tış işler naziri Sergey Lavrov da matbuat konferentsiyası vaqtında Rusiye kelecekteki ateşkes añlaşmasına riayet etmek içün Ukrayinağa Avropa barışıq küçlerini yerleştirüvnen bağlı tekliflerni red etecegini bildirdi.
Rusiye Tış işler nazirliginiñ matbuat kâtibi Mariya Zaharova martnıñ 6-nda muzakere vastasınen ateşkes ve Avropa ordusını Ukrayinağa yerleştirmek imkânını red etti ve Rusiye Ukrayinağa cebe boyunca «nefes almaq içün yer» berecek er bir teklifni qabul etilmez dep sayğanını ayttı.
«Lavrov ve Zaharova ABD mudafaa naziri Pit Hegsetniñ fevralniñ 12-nde Avropa ve Avropadan tış memleketler Ukrayinağa askerler yollamaq kerekligi aqqında teklifini doğrudan-doğru red eteler», – dep qayd etti ISW.
Lavrov bir kere daa tekrarladı, er bir barışıq añlaşması Ukrayina cenkiniñ tahmin etilgen «tamır sebeplerini» köz ögüne almalı, şu cümleden NATOnıñ kenişlemesi toqtatılğanına dair kefaletlerni, Ukrayinanı «yutmağa» tırışqanını ve Rusiyege qarşı telükelerniñ artqanını çezmek kerek. Lavrov bundan evel cenkniñ «tamır sebeplerini» NATOnıñ şarqqa kenişlememek vazifesini bozğanı ve Ukrayina ükümeti etnik ruslarğa ve Ukrayinada rus tiline, matbuatqa ve medeniyetine qarşı ayırıp yapqanını qayd etken edi.
ABD prezidenti Donald Trump fevralniñ 24-nde Rusiye lideri Vladimir Putin Ukrayinada avropalı barışçı askerlerge razı olmağa azır, dep bildirdi. «Oña bir sual berdim. Bir problemi yoq», – dedi Trump jurnalistniñ Putinniñ fikrinen bağlı sualine cevap berip.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
