Keçende Türkiye prezidenti Recep Tayyip Erdoğan, Rusiye prezidenti Vladimir Putinniñ memleketniñ ilk atom elektrik stantsiyasınıñ açıluvı içünn aprelniñ 27-nde Türekiyeni ziyaret ete bilecegini bildirdi.
Türkiyedeki ilk "Akkuyu" Atom elektrik stantsiyası "Rosatom" Rusiye devlet atom energetika şirketi tarafından qurulacaq.
"(Aprelniñ) 27-nde, Putin kelecektir ya da onlayn şekilde qoşulır", - ATV Türkiye telekanalına intervyü berir eken dedi Erdoğan.
Ğarp memleketleri Rusiyeniñ Ukrayinağa istilâ etmesinden soñ Rusiye Federatsiyasına qarşı bir qaç paket sanktsiya qoydı, amma olardan iç birisi Rusiyeniñ özek energetikasına tiymedi.
Martnıñ 17-nde Halqara ceza mahkemesiniñ Başlanğıç mahkeme palatası Rusiyeniñ Ukrayinağa qarşı cenki köntekstinde eki insan içün tevqif orderini çıqardı. Bular Rusiye prezidenti Vladimir Putin ve Rusiye prezidenti yanında bala aqları vekâletlisi Mariya Lvova-Belova. Olar Ukrayinanıñ işğal etilgen topraqlarından ealiniñ (balalarnıñ) qanunsız sürgün etilmesi ve ealiniñ (balalarnıñ) qanunsız şekilde Rusiyege köçürilmesi kibi cenk cinayetlerini yapqanı ile şubeli sayılalar.
Ukrayina Baş prokurorı ofisi Halqara ceza mahkemesiniñ qararını alğışladı ve "Ukrayin ve bütün halqara uquq sisteması içün tarihiy" dep adlandırdı.
Evel Kremlde Gaagadaki Halqara ceza mahkemesini ve onıñ yurisdiktsiyasını tanımaycaqlarını bildirgen ediler.
Türkiye Halqara ceza mahkemesiniñ Roma Statutını tasdıqlağan 118 memleket arasında degil ve buña köre de Rusiye prezidentiniñ tevqifine dair qararnı yerine ketirmey bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
