Link açıqlığı

Saatnıñ esas haberi

Prıstayko, BM Şurasını ukrainalı siyasiy mabüslerni azat etmege yardım etmesine çağırdı


Vadım Prıstayko, Ukraina Tış işler naziri
Vadım Prıstayko, Ukraina Tış işler naziri

Ukraina Tış işler naziri Vadım Prıstayko BM insan aqları Şurasını Rusiye kontrol etken Ukraina topraqlarında vatandaş aqları bozuvlarına çoqça diqqat ayırıp, insanlarnıñ azat etilmesine yardım etmesine çağırdı.

Bu aqta Ukraina Tış işler nazirliginiñ matbuat hızmeti bildire.

«BM insan aqları Şurasınıñ 43-ünci sessiya yüksek seviyeli segment işinde iştirak etip, Ukraina eyyetiniñ yolbaşçısı, tış işler naziri Vadım Prıstayko aq qorçalayıcı komponentini BM bütün faaliyet baqışlarına birleşüv ihtiyacını qayd etti, onsız barışıq, telükesizlik ve inkişaf yönelişlerinde ilerilevge irişmege imkânsızdır», – dep aytıla haberde.

Nazirlikniñ qayd etkenine köre, Prıstayko eyyetlerniñ diqqatını Rusiye akimiyetiniñ işğal altındaki Ukraina topraqlarında bozğan insan aqları ve serbestligine celp etip, Şura, BM aq qorçalayıcı mehanizmleri ve halqara toplulıqnı bu bozuvlarnı toqtatmaq ve qanunsız tutulğan ukrainalılarnı azat ettirmek maqsadınen ğayretini pekitmege çağırdı.

Hatırlatamız, fevralniñ 21-nde Avropa Birliginiñ BM daimiy vekiliniñ muavini Silvio Gonzato fevralniñ 20-nde BM Baş Assambleyasınıñ toplaşuvında iştirak etip, Rusiyeden fevralniñ 15-nde Azaq deñizinde tutqan ukrainalı balıqçılarnı azat etmesini ve qayıqnı qaytarmasını talap etti.

Fevralniñ 20-nde bu toplaşuvda tış işler naziri Vadım Prıstayko da çıqışta bulundı. O, Rusiye Birleşken Milletlerniñ talaplarını körmemezlikke ura ve işğal etilgen Qırımda insan aqlarını boza, dep qayd etti.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG