Ukrayina TİN "DNR" qanunsız silâlı müfrezesiniñ boyevikleriniñ Ukrayina Silâlı Quvetleriniñ terkibinde cenkleşip, esir etilgen üç ecnebiyge çıqarğan "ölüm cezasını" izaatladı.
Nazirlikniñ temsilcisi Oleg Nikolenko Azatlıq.Radiosına bildirdi ki, Ukrayina Silâlı Quvetleriniñ terkibinde cenkleşken bütün ecnebiyler USQ-niñ arbiy hızmetlçileridir, olarnıñ kombatant statusı bar ve olar esirlikte arbiy esirlerniñ aqlarından faydalanalar.
"İşğal etilgen Ukrayina topraqlarında Ukrayina Silâlı Quvetleriniñ arbiy hızmetçileri üzerinde sözde "mahkeme" emiyetsizdir. Bu kibi "mahkemeler" propagandanıñ menfaatlarını qanun ve ahlâhtan üstün tuta, esir arbiylerniñ qaytarılması mehanizmlerini boza. Ukrayina ükümeti Ukrayinanıñ bütün imayecilerini azat etmek içün bütün küç-quvetini qoymağa devam etecek", - dedi o.
İyünniñ 9-nda "DNR" qanunsız silâlı müfrezesiniñ "Yuqarı mahkemesi" Ukrayina Silâlı Quvetleriniñ terkibinde cenkleşken ve esir etilgen üç ecnebiyni ölüm cezasına mahküm etti.
Söz eki britaniyalı Şon Pinner ve Eyden Eslin, mağripli Saadun Bragim aqqındadır. Episi USQ añlaşmanı keniş mıqyaslı istilâ başlamazdan evel imzalağan edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
