Rusiyeniñ Rostov-na-Donudaki Cenübiy bölgesiniñ arbiy mahkemesinde devlet qabaatlayıcısı prokuraturanıñ ekinci Aqmescit Hizb ut-Tahrir davasınıñ mabüslerine bermege teklif etken müddetlerni bildirdi. Bunı "Qırım birdemligi" cemaat birleşmesi haber etmekte.
Prokuror Yevgeniy Kölpikov jurnalist Remzi Bekirov içün 18 yıl, aq qoruyıcı Riza İzetov içün 18,5 yıl, faaller Şaban Ümerov içün 18,5 yıl, Raim Ayvazov içün 18 yıl ve 3 ay ve Farhod Bazarov içün 16 yıl istegen.
"Qırım birdemligi" mühbiriniñ aytqanına köre, qabaatlav tarafı mabüslerniñ episi içün sert rejim ve azat etilgen soñ bir yıldan bir yarım yılğa qadar azatlıqnıñ sıñırlanılmasını istegen.
Qayd etile ki, prokuror tartışmalarda "Rusiye devletiniñ lâdiniy hususiyeti ile beraber din serbestligini tertiplegen" Rusiye Anayasasına atfı etken.
"Mahkemelengenlerniñ Rusiye devletiniñ siyasetinden ve mahsus hızmetlerinden defalarca memnüniyetsizilk bildirip, qabaatını tanımamağanlarına baqmadan, olarnı qabaatı mahkeme esnasında tasdıqlandı", - dedi Kölpikov.
Yanvarnıñ 18 ve ve 19-nda mahkemede advokatlar ve mahkemelengenler sözge çıqacaqlar.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. 2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
