Rusiye ordusı dekabrniñ 20-nde saba Hersonnıñ bütün rayonlarına ücüm etti, dep bildirdi vilâyetniñ arbiy memuriyet yolbaşçısı Oleksandr Prokudin.
«Duşman mesken bina, içtimaiy ve kritik infrastrukturağa aselet ücüm etti. Bu daqqağa köre, bir ölüm ve doquz yaralanğan aqqında belli. Öldürilgen insannıñ qorantasına taziyeler bildirem», – dedi o.
Prokudin vilâyette kütleviy ateş açuvlar neticesinde 60 biñge qadar abuneci elektrik energiyasısız qaldı:
«Kritik infrastruktura obyektlerine zarar ketirilmesi Hersonnıñ Şümenskiy, Jilişçe, Tavriçeskiy ve Ostrov mikrorayonlarında insanlarnı elektriksiz qaldırdı. Belozerka ve Qamışanıda da elektrik yoq».
Dekabrniñ 20-nde saba yerli akimiyet Hersonnı kütleviy bombalağanları aqqında haber etti.
Bir kün evelsi, vilâyet akimiyetiniñ malümatına köre, Herson vilâyetinde Rusiye istilâsı sebebinden bir kişi elâk oldı, 18 insan yaralandı.
Rusiye arbiyleri muntazam sürette çeşit silâ çeşitleri ile ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
