Ukrayina Mudafaa nazirliginiñ Baş istihbarat idaresiniñ yolbaşçısı Kırılo Budanov bildirdi ki, rusiyeliler Rusiyeniñ Rostov-na-Donu şeerinden ilhaq etilgen Qırımğa demiryolnıñ qurulışını aman-aman bitirdi. Onıñ aytqanına köre, bu demiryol "ciddiy bir telüke" ola, amma Budanov, "Qırım köpründen daa qolaydır", dep bildirdi.
"Bu bizim içün ciddiy bir problem ola bile, amma bu demiryolnen ne yapacağımızğa bir şekilde çare taparmız dep ümüt etem, bu işte er kesniñ tecribesi bar. Bu Qırım köprü meselesinden daa qolay", – dep bildirdi Budanov ukrayin umummilliy telemarafonı efirinde.
2023 senesiniñ küzünde Rusiye akimiyeti Rostov-na-Donu ile Qırımnı birleştirecek demiryolnıñ qurulışı başlağanını ilân etti. O vaqıt Donetsk tarafından qurucılıq başlağanı aqqında haber etilgen edi.
Britaniya istihbaratı qayd etti ki, Rusiye Ukrayinanıñ işğal etilgen qısmında demiryolnı devam ettire ve mükemmelleştire, şu cümleden, Mariupolge yañı yolnı qurmaqta, "bu, Zaporojjâ cebesiniñ logistikasını tezleştire bile"
Qırım ilhaqınıñ 10-ncı yıldönümi munasebetinen çıqışta bulunğanda Putin Qırımnı Rusiye ile bağlağan Keriç köpründen keçip, Rusiyeniñ Rostov şeerinden işğal etilgen Qırım yarımadasına Donetsk ve Zaporojjâ vilâyetleriniñ işğal etilgen topraqları üzerinden alternativ demiryol marşrutı aqqında bildirdi. Onıñ aytqanına köre, böyle marşrutnıñ bir qısmı endi çalışıp başladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
