Link açıqlığı

«PrivatBank» Qırım müşterilerine bank sermiyalarını yaqın künleri nasıl etip alacağını aydınlattı.

Bunı bugün «Azatlıq Radiosına» Dnepropetrovsk şeerinde yerleşken «PrivatBanknıñ» baş ofisinde bildirdiler.

Bank müessisesiniñ mesleatçısı Oleg Serganıñ aytqanına köre, bu malğmat Qırımda esaplarını açqan müşterilerge ait.

«Bank müşteriler ögünde olğan borclarğa riayet etüv boyunca işni devam ete. Mence, bu künleri bizler müşterilerge bank esaplarından faydalanuv imkânlarını aydınlatacaqmız», – dep ayttı mesleatçı.

Banknıñ malümatına köre, Ukrainanıñ diger regionlarına köçken qırımlılarnıñ esaplarından bloknı alıp taşlamağa başladılar, er bir müşterige birer-birer yardım kösterile.

«Müşteri bankqa muracaat etse, onıñ sermiyaları yaşağan vilâyetniñ filialına yollanıla», – bildire Serga.

«PrivatBank» matbuat vastaları tarafından tarqatılğan Qırım bölüginiñ Rusiye bankına satılacağını izaatlamadı: «Bizler öşeklerni izaatlamayıq».

«PrivatBank» Qırım müşterileriniñ esapları Rusiyeniñ Qırım işğalinden sebep qapatıldı.

Ukraina Milliy Bankınıñ malümatına köre, «PrivatBank» Ukraina bankları arasında eñ büyük bank sayıla.
XS
SM
MD
LG