«Vagner» gruppasınıñ yolbaşçısı Yevgeniy Prigojin bildirgenine köre, Rusiye ordusı onıñ şahsiy arbiy şirketiniñ cebe arqasındaki lagerlerine raketalarnen ücüm etti.
«Bir çoq askerimiz, arbiy arqadaşımız elâk oldı. Buña berecek cevabımıznen bağlı qarar alacaqmız. Nevbetteki adım bizden», – dep ayttı Prigojin.
Rusiye Mudafaa nazirligi beyanatnı red etip, bunı «informatsion provokatsiya» dep adlandırdı.
«İçtimaiy ağlarda «ÇVK Vagner» cebe arqasındaki lagerlerine Rusiye Federatsiyasınıñ Mudafaa nazirligi darbe endirgenine» dair YE.Prigojin adından tarqatılğan haber ve videolar kerçek degil ve informatsion provokatsiya ola», – dep aytıla müessise haberinde.
Muarririyet bu malümatnı teşkerip olamay.
Bundan evel Prigojin 30 daqqalıq bir video derc etti, anda Rusiye «arbiy-siyasiy reberligini» Ukrayınadaki cenkte muvafaqiyetsizligi içün tenqit etti ve Rusiye prezidentiniñ memuriyetini qabarcılıqta qabaatladı.
O, Rusiye Mudafaa nazirligini Ukrayınadaki cenkniñ kerçek sebepleri meselesinde «cemaatçılıqnı aldatmağa tırışa», dep qabaatladı. İş adamınıñ fikirince, «cenk oligarhlarğa, bugün Rusiyeni idare etken klanğa kerek».
«Bu qabarcı klan er şey ala. Klannıñ çetel biznesi qapatılsa, devlet iç biznesini böle ve oña bere. Şunıñ içün iş adamlarına apiske alalar, banklarnı qapatalar, klan paralarını coymasın dep yapalar», – dep qayd etti o.
Prigojin Rusiye Federatsiyasınıñ arbiy reberligini Rusiye ordusınıñ Ukrayınadaki cenkte muvafaqiyetsiz olğanı içün çoq tenqit etti. Konstantin Dolgovğa bergen intervyüda «ÇVK Vagner» qurucısı Rusiye mudafaa naziri Şoygunı tenqit etip, Rusiye akimiyeti 2022 senesi fevral ayında ilân etken Ukrayına askeriysizleştirilüvi yerine tam tersine irişti, Ukrayına ordusı dünyanıñ eñ küçlü ordularından biri oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
